बेंगळुरू: पाकिस्तान झिंदाबादची घोषणा देणाऱअया अमूल्या लियोन हिचे वडील तिच्यावर संतापले आहेत. अमूल्याने जे काही म्हटले आहे ते चुकीचेच आहे, ते मी कधीही सहन करू शकत नाही, अशी प्रतिक्रिया अमूल्याचे वडिलांनी व्यक्त केली आहे. बेंगळुरूत ऑल इंडिया मजलिस-ए-इत्तेहादुल मुस्लिमीन (एआयएमआयएम) पक्षाचे नेते असदुद्दीन ओवेसी यांनी आयोजित केलेल्या नागरिकत्व दुरुस्ती कायद्याविरोधातील सभेत अमूल्याने मंचावरून पाकिस्तान झिंदाबादच्या घोषणा दिल्या होत्या. त्यावेळी ओवेसी यांनी तिला अडवण्याचा प्रयत्न केला होता. माझ्या मुलीने नागरिकत्व दुरुस्ती कायद्याविरोधातील कार्यक्रमात जे काही केले ते बिलकुल समर्थनीय नाही. ती जे काही म्हटली ते सहन करण्याजोगे नाहीच, असे अमूल्याचे वडील म्हणाले. मुस्लिम लोकांशी संबंध ठेवू नको, असे मी माझ्या मुलीला नेहमीच सांगत आलो आहे. मात्र तिने ते ऐकले नाही. प्रक्षोभक वक्तव्य करू नको असे मी तिला सतत सांगत आलो आहे, मात्र तिने माझे ऐकले नाही, असेही ते म्हणाले. अमूल्याच्या वडील आपले मत व्यक्त करताना पुढे म्हणाले की, 'माझी तब्येत बरी नाही. मला हृदयविकाराचा त्रास आहे. फोनवर बोलताना तिने मला तब्येतीची काळजी घ्या असे सांगितले आणि फोन कट केला. तेव्हा पासून तिचे नि माझे बोलणे झालेले नाही. अमूल्याचे वडील मीडियाशी बोलत असताना त्यांच्या आसपास उभे असलेल्या टोळक्यातील एका व्यक्तीने त्यांच्याशी गैरव्यवहारही केला. ही घटना घडत असताना असदुद्दीन ओवेसी मंचावर उपस्थित होते. अमूल्या पाकिस्तान झिंदाबादच्या घोषणा देत असल्याचे पाहिल्यावर ओवेसींनी तिला अडवण्याचा प्रयत्न केला. मी सभेला संबोधित करणार होतो. त्या पूर्वीच या मुलीने आक्षेपार्ह घोषणा दिल्या. मी तिच्याकडे जाऊन तिला थांबवले. हे काय आहे?... आप क्या बकवास कर रहे हैं?... मी ही बाब सहन करणार नाही, असे आपण त्या मुलीला म्हटल्याचे ओवेसी यांनी सांगितले. त्यानंतर पोलिस आले, असेही ते म्हणाले. आमच्या सभेत पाकिस्तान झिंदाबादची घोषणा देणाऱ्या अमूल्या लिओनीविरुद्ध आम्ही कारवाई करू असेही ओवेसी म्हणाले.
