मुंबई- ज्येष्ठ अभिनेते यांचं आज निधन झालं. ते ६७ वर्षांचे होते. गेल्या दोन वर्षांपासून ते ल्यूकेमिया आजाराशी लढत होते. त्यांच्या निधनाने संपूर्ण देशात शोककळा पसरली आहे. अभिनेते रजा मुराद यांनी ऋषींच्या आठवणींना उजाळा देताना म्हटलं की, 'तो माझ्या कुटुंबाचा एक भाग होता. माझा मित्र होता. माझा ४५ वर्ष जूना मित्र. लैला मजनू सिनेमात आम्ही एकत्र काम केलं होतं. मी त्यांच्यासोबत अनेक सिनेमांत काम केलं. त्यांच्या निधनाच्या बातमीवर माझा खरंच विश्वास बसत नाहीय.' मुराद पुढे म्हणाले की, 'काल इरफानच्या निधनाची बातमी मिळाली आणि ऋषी गेल्याचं कळलं. मी काय बोलू तेच कळत नाही. माझा भाऊ गेला. नेहमी फोन करून माझ्या तब्येतीची चौकशी करायचा. आयुष्याची विडंबना तर पाहा.. त्याचं अंत्यदर्शनही आम्ही घेऊ शकत नाही. त्याच्या घरीही आम्ही जाऊ शकत नाही.' हे बोलताना रझा मुराद यांना अश्रू अनावर झाले आणि ते रडू लागले. कपूर कुटुंबियांकडून जारी करण्यात आलेल्या अहवालात गुरुवारी सकाळी ८.४५ मिनिटांनी ऋषी यांनी अखेरचा श्वास घेतला. गेल्या दोन वर्षांपासून ते ल्यूकेमिया आजाराशी लढत होते. गेल्या वर्षी भारतात परतल्यानंतर ते फार आनंदी होते आणि त्यांना प्रत्येकाला भेटायची इच्छा होती. पण हा आजार त्याच्यापासून दूर गेला नाही. दरम्यान, कॅन्सरवरील उपचारासाठी ऋषी कपूर अमेरिकेत गेले होते. तिथे वर्षभर ते होते. त्यानंतर गेल्या सप्टेंबर महिन्यात ते भारतात परतले. फेब्रुवारी महिन्यात संसर्गामुळे त्यांना रुग्णालयात दाखल करावे लागले होते. त्यानंतर त्यांची प्रकृती चांगली होती. मात्र बुधवारी प्रकृती पुन्हा बिघडल्याने त्यांना रुग्णालयात दाखल करावे लागले आहे.
