म. टा. प्रतिनिधी, : शहर परिसरातील दोन करोनाबाधितांचा उपचारादरम्यान घाटी रुग्णालयामध्ये सोमवारी (२५ मे) मध्यरात्री मृत्यू झाला. त्यामुळे जिल्ह्यातील करोनाबाधितांच्या मृत्यूची संख्या ५८ झाली आहे. तर २२ नवीन करोनाबाधित रुग्ण सापडले आहेत. शहर परिसरातील जयभीमनगर येथील ७२ वर्षीय करोनाबाधित पुरुष रुग्णास जिल्हा सामान्य रुग्णालयामधून २४ मे रोजी शासकीय वैद्यकीय महाविद्यालय व रुग्णालय (घाटी) येथे दाखल करण्यात आले होते. रुग्णाला उच्च रक्तदाब आणि दम्याचा त्रास होता. उपचारादरम्यान प्रकृती खालावल्याने व्हेंटिलेटरवर ठेवण्यात आले होते. मात्र दोन्ही फुफ्फुसांचा न्युमोनिया तसेच गंभीर श्वसनविकार, उच्चरक्तदाब व दमा यातून निर्माण झालेली गुंतागुंत यामुळे रुग्णाचा सोमवारी मध्यरात्री १ वाजून ५० मिनिटांनी मृत्यू झाला. तसेच जाधववाडी येथील ५७ वर्षीय पुरुष रुग्णाला करोनाच्या लक्षणांमुळे १८ मे रोजी घाटीमध्ये दाखल करण्यात आले होते. संबंधित रुग्णास क्षयरोग तसेच इतर आजार होते. संबंधित रुग्ण हा करोनाबाधित असल्याचे १९ मे रोजीच्या अहवालातून स्पष्ट झाले होते. उपचारादरम्यान प्रकृती खालावल्याने रुग्णास व्हेंटिलेटर लावण्यात आले होते. मात्र दोन्ही फुफ्फुसांचा न्युमोनिया तसेच क्षयरोग यातून निर्माण झालेल्या गंभीर गुंतागुंतीमुळे रुग्णाचा सोमवारी मध्यरात्री साडेबारा वाजता मृत्यू झाला, असे घाटी प्रशासनाच्या वतीने सांगण्यात आले. त्यामुळे जिल्ह्यातील करोनाबाधितांच्या मृत्यूची संख्या ५८ झाली आहे, तर आतापर्यंत औरंगाबाद जिल्ह्यात १३२७ करोनाबाधित असल्याचे स्पष्ट झाले आहे. २२ नवीन करोनाबाधित शहर परिसरात आणखी २२ बाधित नव्याने आढळून आल्याने जिल्ह्यातील करोनाबाधितांची संख्या १३२७ झाली आहे, तर आतापर्यंत जिल्ह्यातील ५६ करोनाबाधितांचा मृत्यू झाला आहे आणि ७७० रुग्ण हे करोनामुक्त होऊन घरी परतले आहेत. शहर परिसरात आढळलेल्या नव्या बाधितांमध्ये जुना मोंढा येथील १, बायजीपुरा १, रोहिदासपुरा १, कांचनवाडी १, भारतमाता नगर, हडको १, नवीन वस्ती जुनाबाजार ४, जुना हनुमान नगर १, हनुमान चौक १, न्याय नगर १, कैलास नगर १, रामनगर १, एन ८, सिडको ४, रोशनगेट १, एन ११, सुभाषचंद्र बोस नगर १, पुंडलिक नगर १, भवानी नगर १ या भागातील ११ महिला व ११ पुरुषांचा समावेश आहे.
