म. टा. विशेष प्रतिनिधी, पुणे: पुण्यातील गणेश विसर्जनाची मिरवणूक संपून २४ तास उलटले असले तरीही सगळीकडे चर्चा आहे ती या मिरवणुकीदरम्यान झालेल्या ध्वनिप्रदूषणाची, त्यातील हिडीस नृत्यांची आणि काळजाचा ठोका चुकविणाऱ्या स्पीकरच्या भिंतींचीच. समाजमाध्यमांच्या भिंती या चर्चेने रंगत आहेतच; पण प्रत्यक्षात भेटल्यानंतरही याच चर्चा रंगत आहेत. या प्रकाराला आळा घालण्याचे धाडस कोण दाखविणार, हाच प्रश्न पुणेकरांना पडला आहे.वास्तविक ध्वनिप्रदूषणाबाबत सर्वोच्च्य न्यायालयाने पुरेसे स्पष्ट आदेश दिले आहेत. आवाजाची पातळी किती असावी याचाही उल्लेख त्या आदेशांमध्ये आहे. पण सध्या फक्त वेळेची मर्यादा सोडली तर हे आदेशही धाब्यावर बसविले जात आहेत. विसर्जन मिरवणूकीमध्ये या सगळ्यांनी कळस गाठला होता.गणेश विसर्जन झाल्यानंतर परतीच्या मार्गावरही अनेक मंडळांनी या स्पीकरच्या भिंती सुरूच ठेवून आपली नाचण्याची हौस भागवून घेतली. त्यापूर्वी ढोल-ताशा पथकांच्या सरावाने संपूर्ण शहराला असेच दणाणून सोडले होते. उत्सवाच्या अगोदर महिन्याहून अधिक काळ दररोज संध्याकाळी केला जाणारा हा सराव त्या परिसरातील नागरिकांच्या दृष्टीने डोकेदुखी ठरला होता. पोलिसांकडे तक्रारी केल्यानंतरही अनेक स्थानिक 'दादा'-'भाईं'च्या आशीर्वादाने या पथकांवरची कारवाई टळली होती. मिरवणुकीमध्ये ढोल व ताशांच्या संख्येवर बंधन घालण्याचे तसेच संपूर्ण मिरवणुकीमध्ये फक्त दोनच ठिकाणी स्थिर वादन करण्याचा नियम पोलिसांनी घालून दिला होता. मात्र, तो नियम सरसकट मोडला गेला. पोलिसही हतबल झाल्यासारखे हा सर्व प्रकार सहन करण्यापलीकडे काही करू शकले नाहीत. या सर्व आवाजाचा परिणाम फक्त लहान मुले, वयोवृद्ध व आजारी माणसांवरच होतो असे नव्हे; तर सामान्य नागरिकही त्याने त्रस्त झाले होते. घराच्या खिडक्यांच्या काचा हादरण्यापासून रस्त्यावरील मोटारीच्या आतदेखील या आवाजाची कंपने जाणवत होती. त्यामुळे हा त्रास आता कोण कमी करील, याचीच चर्चा समाजमाध्यमांवर रंगली होती.काही वर्षांपूर्वी तत्कालीन पोलिस आयुक्त गुलाबराव पोळ यांनी नवरात्रीच्या तोरणांच्या मिरवणुकांवर बंदी घातली होती. त्याची कडक अंमलबजावणी करण्यात पोलिसांनी कोणतीही कसर ठेवली नव्हती. तशाच कडक नियमांची व अंमलबजावणीची अपेक्षा आता पुणेकर करीत आहेत. या शहराचे पालकमंत्री, आमदार व प्रशासकीय अधिकारी याबाबतचा निर्णय घेण्याचे धाडस दाखविणार का, हाच प्रश्न या चर्चेच्या दरम्यान विचारला जात होता. याचा निर्णय आत्ताच घेणे आवश्यक असल्याचे प्रतिपादनही या चर्चांमध्ये होत होते. कारण पुढच्या गणेशोत्सवापर्यंत त्यातील हवा निघून जाते व पुन्हा 'ये रे माझ्या मागल्या' या म्हणीनुसार सर्व काही पूर्वीसारखे सुरू राहते, असा अनुभव पुणेकरांना येत आहे.कळवा तुमचे मत'डीजे'वरील बंदीबाबत वाचकांना काय वाटते? तुमच्या प्रतिक्रिया matapune@timesgroup.com या ई-मेल आयडीवर कळवाव्यात.
