पुणे: पुणेकर विशेषतः खरेदीसाठी बाहेर पडणाऱ्या महिला वर्गासाठी आनंदाची बातमी आहे. शहराचं 'हार्ट' समजली जाणारी आता पुन्हा गजबजून जाणार आहे. येत्या सोमवारपासून (१ जून) तुळशीबाग पुन्हा सुरू करण्याचा व्यापारी संघटनेचा विचार आहे. आरोग्याच्या दृष्टीने सुरक्षेची खबरदारी घेतली तर, तुळशीबाग सुरू करण्यास महापालिका प्रशासनाचीही कोणतीही हरकत नसल्याचं व्यापारी संघटनेकडून सांगण्यात आलं. करोनाचा राज्यात कहर सुरूच आहे. गेल्या काही दिवसांपासून रुग्णसंख्या वाढत असली तरी, करोनाबाधित रुग्ण बरे होण्याचे प्रमाणही वाढले आहे. तर मृत्यूदरही कमी आहे. राज्यात मुंबईनंतर पुण्यात सर्वाधिक करोनाबाधित आहेत. त्यामुळे लागू झाल्यापासून पुण्यातील बाजारपेठा जवळजवळ बंदच आहेत. व्यापाराच्या दृष्टीनं महत्वाची समजली जाणारी आणि मोठ्या आर्थिक उलाढालीचं केंद्र समजली जाणारी पुण्यातील तुळशीबाग या लॉकडाउनच्या काळात बंद आहे. ही तुळशीबाग संसारोपयोगी वस्तू, सौंदर्य प्रसाधनं, रेडीमेड कपडे, हस्तकलेच्या वस्तू आदी सर्व एकाच ठिकाणी मिळण्याचे हक्काचे ठिकाण आहे. लॉकडाउनच्या काळात जवळपास दोन महिने तुळशीबाग बंद होती. मात्र, आता ती पुन्हा सुरू करण्याचा व्यापाऱ्यांचा विचार आहे. त्यादृष्टीनं व्यापारी संघटनेनं हालचाली सुरू केल्या आहेत. तुळशीबाग परिसर प्रतिबंधित क्षेत्रात येत नसल्यानं तो पूर्ववत सुरू करण्यात यावा, अशी मागणी व्यापारी संघटनेची आहे. त्यांनी यासंदर्भात महापालिका प्रशासनाला निवेदन दिलं आहे. आरोग्याच्या दृष्टीनं खबरदारीच्या सर्व उपाययोजना करून बाजार खुलं करण्याची हमी व्यापारी संघटनेच्या वतीनं निवेदनाद्वारे दिली आहे. प्रशासनानंही बाजारपेठ खुली करण्यास अनुकूलता दर्शवल्याचं व्यापारी संघटनेनं सांगितलं आहे. त्यामुळं येत्या १ जूनपासून तुळशीबाग पुन्हा गजबजून जाण्याची शक्यता आहे. व्यापाऱ्यांनीही दुकानांमध्ये स्वच्छतेची कामे हाती घेतली आहेत. तुळशीबाग परिसरात जवळपास तीनशे दुकानं आहेत. दिवसाआड एक दुकान सुरू करण्याचा व्यापाऱ्यांचा विचार आहे. तसंच तुळशीबागेच्या प्रवेश मार्गांवर सुरक्षा रक्षक नेमले जाणार आहेत. ग्राहकांच्या आरोग्याच्या दृष्टीनं खबरदारीही घेतली जाणार आहे, असं व्यापारी संघटनेकडून सांगण्यात आलं आहे.
