मुंबई मुंबईत जी-दक्षिण वॉर्डातील शिवसेनेच्या एका ज्येष्ठ नगरसेविकेला करोनाची बाधा झाली आहे. त्यांच्यावर परळ येथील ग्लोबल हॉस्पीटलमध्ये उपचार सुरू आहेत. यासोबतच नगरसेविकेच्या पतीलाही विलगीकरण कक्षात ठेवण्यात आल्याचीही माहिती पक्षाच्या एका नेत्याने दिली आहे. संबंधित नगरसेविकेच्या वॉर्डमध्ये आतापर्यंत ६५० हून अधिक करोनाचे रुग्णा आढळले आहेत. नगरसेविकेला एक दिवस हॉस्पीटलच्या आयसीयूमध्ये ठेवण्यात आलं होतं. आता त्यांच्या प्रकृतीत सुधारणा झाली असून त्यांच्यावर सर्वसामान्य वॉर्डमध्येच उपचार सुरू आहेत. नगरसेविकेसोबत या वॉर्डमध्ये ड्युटीवर असलेल्या पोलीस उपायुक्तांनाही करोनाची लागण झाल्याचं उघड झालं आहे. मात्र त्यांच्या अतिसौम्य पद्धतीची लक्षणं असल्यानं त्यांना होम क्वारंटाइन करण्यात आलं आहे. पोलिसांनी दिलेल्या माहितीनुसार, संबंधित पोलीस अधिकाऱ्यावर जी-दक्षिण वॉर्डातील गर्दीच्या ठिकाणांवर नियंत्रण ठेवण्याची जबाबदारी देण्यात आली होती. ''पोलीस उपायुक्तांसोबतचे काही कर्मचारी करोना पॉझिटीव्ह आढळल्याने त्यांनाही चाचणी करण्याची सुचना दिली गेली होती. चाचणीत ते देखील पॉझिटीव्ह असल्याचं आढळून आलं. मात्र अतिसौम्य लक्षणं असल्यानं त्यांना होम क्वारंटाइनच्या सूचना डॉक्टरांनी केल्या आहेत. त्यानुसार ते आता त्यांच्या घरीच क्वारंटाइन आहेत. त्यांचा कार्यभार आता गुन्हे विभागाचे पोलीस उपायुक्त शहाजी उपम यांना देण्यात आला आहे", असे एका पोलीस अधिकाऱ्याने सांगितले. दरम्यान, याच वॉर्डात ६ पोलीस अधिकारी आणि ६ हवालदार करोना पॉझिटीव्ह आढळले आहेत. जेजे मार्ग पोलीस ठाण्याच्या जवळपास ४८ कर्मचारी आणि अधिकाऱ्यांना क्वारंटाइन करण्यात आल्याची माहिती एका वरिष्ठ पोलीस अधिकाऱ्यांनी दिली आहे.
