येरवडा: खुनाच्या गुन्ह्यात शिक्षा भोगणाऱ्या दोन कैद्यांना पॅरोल मंजूर झाल्यानंतर त्यांच्या स्वागतासाठी ३० ते ४० तरुणांनी कारागृहाबाहेर गर्दी केल्याचा धक्कादायक प्रकार उघडकीस आला आहे. त्यांनी लॉकडाऊनच्या नियमांचा भंग करत वाहनांचा कर्णकर्कश आवाज आणि आरडाओरडा केला. पोलिसांनी पाठलाग करून एका पोलीस कर्मचाऱ्यासह आठ जणांना अटक केली असून, त्यांच्याकडून पिस्तूल, जिवंत काडतुसे, लोखंडी सळ्या जप्त केल्या आहेत. खुनाच्या गुन्ह्यातील दोन कैद्यांना पॅरोल मंजूर झाला. हे कैदी कारागृहाबाहेर आल्यानंतर त्यांच्या स्वागतासाठी ३० ते ४० तरुणांनी गर्दी केली. वाहनांमधून जाताना कर्णकर्कश आवाज आणि आरडाओरडा करत लॉकडाऊनच्या नियमांचा भंग केला. याबाबतची माहिती मिळताच, पोलिसांनी त्यांचा पाठलाग केला. त्यांच्या वाहनांना अडवले. यावेळी कारागृहातून पॅरोलवर सुटका झालेले दोन्ही कैदी हे पसार झाले. या तरुणांसोबत पिंपरी-चिंचवड आयुक्तालयात काम करणारा एक पोलीस कर्मचारीही होता. त्याच्यासोबत कारमध्ये अन्य तिघेही होते. पोलिसांनी कारमधून बेकायदा पिस्तुल, पाच जिवंत काडतुसे, लोखंडी सळ्या जप्त केल्या आहेत. पळून गेलेला कैदी हा पोलीस कर्मचाऱ्याचा भाऊ असल्याचं कळतं. विश्रांतवाडी पोलिसांनी कारवाई करून पोलीस कर्मचाऱ्यासह आठ जणांना अटक केली आहे. त्यांच्याकडील तीन कारही जप्त केल्या आहेत.
