कोलकाता: पश्चिम बंगालमधील अम्फान चक्रीवादळामुळे झालेल्या परिस्थितीची पाहणी करण्यासाठी पंतप्रधान नरेंद्र मोदी आज पश्चिम बंगाल आणि ओडिशा राज्याचा दौर्या करणार आहेत. कालच (गुरुवार) मुख्यमंत्री यांनी पंतप्रधान मोदींना बंगालमध्ये येऊन चक्रीवादळानंतरच्या परिस्थितीची पहाणी करण्याचे आवाहन केले होते. आज सकाळी साडेदहा वाजता कोलकाता विमानतळावर पोहोचतील. यानंतर मोदी आणि ममता बॅनर्जी कोलकात्यासह उत्तर आणि दक्षिण जिल्ह्यांमधील बाधित भागाचे हवाई सर्वेक्षण करतील. पश्चिम बंगालमध्ये अॅम्फान महाचक्रीवादळामुळे आतापर्यंत ७२ लोकांचा मृत्यू झाला आहे. तर, एकट्या कोलकात्यामध्ये १९ लोकांचा मृत्यू झाला आहे. पंतप्रधान मोदी ५७ दिवसानंतर जाणार दिल्लीबाहेर पंतप्रधान आज पश्चिम बंगालच्या दौर्यावर जाणार असल्याची माहिती पंतप्रधान कार्यालयाने ट्विट करत दिली. विशेष म्हणजे पंतप्रधान मोदी ५७ दिवसांनी दिल्लीच्या बाहेर पडत आहेत. दरम्यानच्या काळात, व्हिडिओ कॉन्फरन्सिंगच्या माध्यमातून पंतप्रधानांनी देशांतर्गत तसेच आंतरराष्ट्रीय बैठकीत भाग घेतला. लॉकडाउन सुरू असताना ते आज पहिल्यांदाच दिल्लीच्या बाहेर जातील. केंद्र आणि ममता सरकार यांच्यात संघर्ष गेल्या अनेक दिवसांपासून ममता बॅनर्जी आणि केंद्र सरकारदरम्यान संघर्ष सुरू आहे. मग तो कोविड -१९ चा विषय असो किंवा स्थलांतरित मजुरांचा प्रश्न असो. कोविड -१९ च्या बाबतीत केंद्राच्या आरोग्य पथकाला ममतांनी पश्चिम बंगालमध्ये येण्यापासून रोखलं होतं. त्यावर बरीच खळबळ उडाली होती. त्याच वेळी स्थलांतरित मजुरांच्या मुद्यावर केंद्र सरकार आणि तृणमूल काँग्रेस समोरासमोर आले होते. पश्चिम बंगालमधील लोकसभा निवडणुकीत चांगली कामगिरी केल्यावर आता पुढच्या वर्षी होणाऱ्या विधानसभा निवडणुकांवर भाजपचे लक्ष लागले आहे.
