मुंबई : मल्टी कमॉडिटी एक्सचेंजमध्ये () बुधवारी सोन्याचा भाव ०.५५ टक्क्यांनी कमी झाला. सध्या सोने प्रती दहा ग्रॅमला ४६०६८ रुपयांवर ट्रेड करत आहे. चांदीचा भाव एका किलोसाठी ४७५९० रुपये आहे. त्यात ०.५ टक्क्याची घसरण झाली आहे. इंडियन बुलियन अँड ज्वेलर्स असोसिएशननुसार बुधवारी सोन्याचा भाव प्रती १० ग्रॅमला ४६७९९ रुपये झाला. त्यात २०१ रुपयांची घसरण झाली. मंगळवारी तो ४७००० प्रती १० ग्रॅम होता. मुंबईत २२ कॅरेट सोन्याचा भाव ४५९०० रुपये आहे. तर दिल्लीत तो ४६००० रुपये आहे. चीन आणि अमेरिका या दोन्ही देशांमधील तणाव मागील काही दिवसांपासून वाढत आहे. याआधी व्यापारी युद्धामुळे दोन्ही देश एकमेकांसमोर उभे ठाकले होते. आता करोनाच्या उत्पत्तीवरून दोन्ही देशांमधील संबंध चांगलेच ताणले आहेत. हॉंगकॉंगमध्ये चीनकडून होणाऱ्या प्रस्तावीत सुरक्षा कायदावरून अमेरिकेने हॉंगकॉंग आणि चीनवर निर्बंध लादण्याचा इशारा दिला आहे. परिणामी त्याचा परिणाम सोन्याच्या किमतीवर झाला आहे. सध्या जागतिक बाजारात सोन्याचा भाव १७१०.०१ डॉलर प्रती औंस आहे. जागतिक बाजारात सोन्याचा भाव दोन आठवड्याचा नीचांकावर आला आहे. करोनाच्या संकटातून सावरून हळुहळु जगभरातील अर्थव्यवस्था खुल्या होत आहेत, मात्र चीन आणि अमेरिकेतील तणावाने सोन्याच्या किमतीवर परिणाम केला असे, मत आनंद राठी शेअर्स अँड स्टॉक ब्रोकर्सचे विश्लेषक जिगर त्रिवेदी यांनी सांगितले. मात्र या सर्व घडामोडीत अजूनही सोने हे सुरक्षित गुंतवणूक पर्याय म्हणून सरस ठरत आहे, असे त्यांनी सांगितले. या महिन्याच्या सुरुवातीला सोन्याच्या किमती प्रती १० ग्रॅमला ४७९८० रुपयांवर गेल्या होत्या.
