मुंबई: नेते व माजी मंत्री हे करोनावर मात करून घरी परतले असून कार्यकर्त्यांनी फटाके फोडून, फुलांचा वर्षाव करून त्यांचे जंगी स्वागत केल्याचा व्हिडिओ व्हायरल होत आहे. यावेळी कार्यकर्त्यांनी मोठी गर्दी करत संबंधी निर्देशांचे उल्लंघन केल्याचे स्पष्टपणे दिसत आहे. चंद्रकांत हंडोरे यांचा चाचणी अहवाल पॉझिटिव्ह आल्यानंतर नवी मुंबईतील एका रुग्णालयात त्यांच्यावर उपचार सुरू होते. गेल्या २० दिवसांपासून ते तिथे दाखल होते. त्यांच्या प्रकृतीबाबत कार्यकर्त्यांना चिंता लागून राहिली होती. दरम्यान, हंडोरे यांच्या लागोपाठ तीन चाचण्या पॉझिटिव्ह आल्याने काळजीत आणखीच भर पडली होती. या स्थितीत हंडोरे यांनी करोनावर मात करण्यात यश मिळवले. त्यांची चौथी चाचणी निगेटिव्ह आली आणि शनिवारी त्यांना रुग्णालयातून डिस्चार्ज देण्यात आला. चंद्रकांत हंडोरे, त्यांचे कुटुंबीय आणि कार्यकर्ते या सर्वांसाठीच हा आनंदाचा क्षण होता. मात्र, हा आनंद व्यक्त करताना कार्यकर्त्यांना सोशल डिस्टन्सिंगचे भान राहिले नाही आणि वेगळाच पेच निर्माण झाला. मुंबईतील येथे पी. एल. लोखंडे मार्गावर हंडोरे यांचे घर आहे. हंडोरे यांना डिस्चार्ज मिळाल्याचे कळताच त्यांच्या स्वागतासाठी या भागात कार्यकर्त्यांची मोठी गर्दी झाली. करोनाचा प्रादुर्भाव टाळण्यासाठी सोशल डिस्टन्सिंगचं पालन अत्यावश्यक असताना सर्व नियम मोडून कार्यकर्ते हंडोरे यांच्या घराजवळ जमले. ढोल-ताशांच्या गजरात, फटाक्यांची आतषबाजी करून हंडोरे यांचे जंगी स्वागत करण्यात आले. कार्यकर्त्यांच्या या अतिउत्साहाने परिसरातील नागरिक हादरले आहेत. हे तर करोनाला आमंत्रणच असल्याच्या भावना काहींनी व्यक्त केल्या. चंद्रकांत हंडोरे यांच्या या जंगी स्वागताचा व्हिडिओ व्हायरल होत असून स्वागतासाठी गर्दी करणाऱ्या अनेक कार्यकर्त्यांना मास्क लावण्याचाही विसर पडल्याचे दिसत आहे. कार्यकर्त्यांना नमस्कार करत हंडोरे घराच्या दिशेने चालत गेल्याचेही दिसत आहे. हंडोरे यांनी मोजक्या शब्दांत कार्यकर्त्यांचे आभारही मानले. यावेळी तोंडाचा मास्क हटवून तो पुन्हा लावताना ते दिसत आहेत. दरम्यान, करोनामुक्तीनंतरच्या या स्वागताने अनेक प्रश्न उपस्थित झाले असून असा जल्लोष सध्याच्या गंभीर स्थितीत आरोग्याच्या दृष्टीने धोक्याचा असल्याचे मत व्यक्त होत आहे.
