अहमदनगर: घाटकोपर येथून आपल्या मूळगावी निघालेल्या एका ३० वर्षीय महिलेला करोना झाल्याचे समोर आले आहे. प्रवासात त्रास होऊ लागल्याने नगरच्या जिल्हा रुग्णालयात संबंधित महिलेला दाखल करण्यात आले होते. यावेळी सदर महिलेची तपासणी केली असता संबंधित महिला करोनाबाधित असल्याचे आढळले आहे. दरम्यान, या महिलेचा पती मुंबई येथे पोलिस कॉन्स्टेबल म्हणून कार्यरत असून त्याचा अहवाल निगेटिव्ह आला आहे. नगरच्या जिल्हा रुग्णालयातून पुण्याच्या लष्करी वैद्यकीय महाविद्यालयाकडे पाठविण्यात आलेले सात व्यक्तींचे स्त्राव चाचणी अहवाल काल रात्री उशिरा प्राप्त झाले. त्यापैकी ६ व्यक्तींचे अहवाल निगेटिव्ह आले असून एका ३० वर्षीय महिलेचा अहवाल हा करोना पॉझिटिव्ह आला आहे. ही महिला आणि तिचा पती हे मुंबईत घाटकोपर येथे राहत असून प्रवासात जास्त त्रास जाणवू लागल्याने तिला जिल्हा रुग्णालयात दाखल करून तिची तपासणी करण्यात आली होती. त्यावेळी तिला सर्दी, ताप आणि खोकला याचा त्रास जाणवत होता. तिच्या घशातील स्त्राव तपासणीसाठी पाठविण्यात आला होता. त्यात ती बाधित असल्याचे आढळले. तिच्या पतीचा अहवाल मात्र निगेटिव्ह आला असून तो मुंबईमध्ये पोलिस कॉन्स्टेबल म्हणून कार्यरत आहे. यापूर्वीही जिल्ह्यात बाहेरील जिल्ह्यातून आलेली व्यक्ती बाधित असल्याचे आढळून आले होते. तो बाधित रुग्ण आष्टी (जि. बीड) येथील होता. त्याच्यावर येथील जिल्हा रुग्णालय आणि बूथ हॉस्पिटल मध्ये उपचार केले होते.
