मुंबई: मुंबईत आज भल्या पहाटे पावसाने वर्दी दिली. पहाटे साडेचार वाजताच्या सुमारास शहर, उपनगर आणि परिसरात हलक्या सरी कोसळल्या. त्यानंतर मुंबईत ढगाळ वातावरण असून मुंबईकरांना आज सूर्यदर्शन होऊ शकलं नाही. दरम्यान, उद्या मंगळवारी हलक्या सरी तर बुधवारी मुंबईत जोरदार पावसाचा अंदाज विभागाने वर्तवला आहे. मुंबईचं हवामान अचानक बदललं आहे. रविवारी दिवसभर मुंबईत ढगाळ वातावरण होतं. पाऊस पडेल अशी शक्यता होती आणि मध्यरात्रीनंतर पहाटे पावसाने हजेरी लावलीच. आज पहाटे साडेचार वाजताच्या सुमारास मुंबईत पावसाने वर्दी दिली. काही भागांत हलक्या तर काही भागांत जोरदार सरी बरसल्या. दिवस उजाडल्यानंतरही मुंबईच्या आभाळात ढग दाटलेले असून काही भागांत पावसाचा शिडकावाही सुरू आहे. मान्सूनपूर्व पावसाला अजून थोडी वाट पाहावी लागणार असली तरी पहिल्या पाऊससरींनी मुंबईकर सुखावले आहेत. पहाटेच्या मंद वाऱ्यांसोबत मातीचा सुगंधही दरवळल्याने आल्हाददायक वातावरणाची अनुभूती मुंबईकर घेत आहेत. करोना साथीच्या विळख्यात जखडून असलेल्या मुंबईकरांसाठी ही काहीशी दिलासादायक सकाळ म्हणावी लागेल. वादळाचा धोका, पावसाचा इशारा अरबी समुद्राच्या आग्नेय दिशेला आणि लगतच्या पूर्व-मध्य अरबी समुद्रात तसेच, लक्षद्वीपजवळ कमी दाबाचे क्षेत्र निर्माण झाले आहे. येत्या ४८ तासांमध्ये या क्षेत्राची तीव्रता वाढून त्याचे चक्रीवादळात रूपांतर होण्याचा अंदाज आहे. ' ' असे नामकरण होणारे उत्तर दिशेकडे प्रवास करून ते ३ जूनला उत्तर आणि गुजरातच्या दिशेने मार्गक्रमण करणार आहे. परिणामी किनारपट्टीवर जोरदार पावसाची शक्यता व्यक्त होत आहे. हा पाऊस मुंबईतही कोसळणार असा अंदाज आहे. मुंबईत उद्या जोरदार पाऊस मुंबईत उद्या मंगळवारी हलक्या सरी तर बुधवारी जोरदार पावसाचा अंदाज हवामान विभागाने वर्तवला आहे. या काळात वाऱ्यांचा जोरही वाढलेला असेल. ३ आणि ४ जून या दिवशी मच्छिमारांनी समुद्रात जाऊ नये, असाही इशारा देण्यात आला आहे. तर सध्या समुद्रात असलेल्या मच्छिमारांनी किनाऱ्याकडे परतावे अशा सूचनाही त्यांना देण्यात आल्या आहेत. २ ते ३ जून या काळात दक्षिण महाराष्ट्र किनारपट्टीवर ६५ ते ८५ किलोमीटर प्रती तास असा वाऱ्याचा वेग असेल. हा वेग वाढून ३ जून रोजी सकाळी महाराष्ट्र आणि गुजरात किनारपट्टीजवळ ९० ते ११० किलोमीटर प्रति तास या वेगाने वारे वाहण्याची शक्यता आहे. प्रादेशिक हवामान विभागाने नोंदवलेल्या पूर्वानुमानानुसार पालघरसाठी ३ आणि ४ जून रोजी रेड अलर्ट देण्यात आला आहे. तर ठाणे, मुंबई, रायगड येथे या दोन दिवशी काही ठिकाणी मुसळधार ते तीव्र मुसळधार पावसाची शक्यता आहे.
