मुंबई : मल्टी कमॉडिटी एक्सचेंजवर (MCX) सोन्याचा भाव १० ग्रॅमला ४७२०० रुपये झाला. त्यात १३४ रुपयांची घसरण झाली. शुक्रवारी सोने ४७३३४ रुपयांवर बंद झाले होते. चांदीचा भाव मात्र २९० रुपयांनी कमी झाला आहे. सध्या कमॉडिटी बाजारात चांदीचा भाव किलोला ४७४०० रुपयांवर ट्रेड करत आहे. करोना रोखण्यासाठी २५ मार्चपासून केंद्र आणि राज्य सरकारने टाळेबंदी जाहीर केली होती. त्यामुळे अत्यावश्यक वस्तूंची दुकाने वगळता इतर दुकाने आणि बाजारपेठा पूर्ण बंद होत्या. मात्र गेल्या आठवड्यात टाळेबंदी शिथिल करण्यात आली. मुंबईत आता समविषम पद्धतीने दुकाने खुली झाली आहेत. त्यानुसार मुंबईतील शेकडो वर्ष जुना असलेल्या दक्षिण मुंबईतील झवेरी बाजातात देखील सराफांची दालने खुली झाली आहेत. दादर, लालबाग, अंधेरी, बोरिवली येथील बड्या सराफांची दालने आता खुली झाली आहेत. मात्र सराफांना कारागिरांचा तुटवडा जाणवत आहे. आज सराफा बाजारात मात्र सोने आणि चांदीच्या दरात वाढ झाली आहे. www.goodreturns.in या वेबसाइटनुसार आज मुंबईत सोने दरात १० रुपयांची किंचित वाढ झाली. २२ कॅरेट सोन्याचा भाव ४६०२० रुपये झाला आहे. २४ कॅरेट सोने आज ४७०२० रुपयांवर गेले आहे. चांदीचा दर प्रती किलो ४७७२० रुपये आहे. शनिवारी सोने ६०० रुपयांनी महागले होते. शनिवारी ससोन्याचा भाव २२ कॅरेटला ४६००० रुपये आणि २४ कॅरेटला ४७००० रुपये झाला होता. सोमवारी दिल्लीत २२ कॅरेट सोन्याचा भाव ४६२७० रुपये झाला आहे. २४ कॅरेटसाठी ४७४७० रुपये आहे. चांदीचा दर एक किलोला ४७७२० रुपये आहे. रविवारी तो ४७७१० रुपये होता. कोलकात्यात आज सोने २२ कॅरेटसाठी ४६२७० रुपये असून २४ कॅरेटचा भाव ४७४७० रुपये आहे. चेन्नईत २२ कॅरेटचा भाव ४५५४० रुपये आणि २४ कॅरेटचा भाव ४९६७० रुपये झाला आहे. असोसिएशन ऑफ म्युच्युअल फंड्स इन इंडियाच्या (अॅम्फी) ताज्या माहितीनुसार मे महिन्यात गोल्ड ईटीएफमध्ये ८१५ कोटी रुपयांची गुंतवणूक झाली आहे. ऑगस्ट २०१९पासून गोल्ड ईटीएफमध्ये आतापर्यंत ३,२९९ कोटी रुपयांची गुंतवणूक झाली आहे.सोन्यातील गुंतवणूक सुरक्षित असल्याच्या भावनेने मोठ्या प्रमाणात गुंतवणूक होत आहे. त्यातच २०१९ आणि २०२० या वर्षात मे महिन्यापर्यंत सोन्याने चांगली कामगिरी केल्याने गुंतवणूकदारांचा उत्साह वाढला आहे. सोन्याला २०११ नंतर प्रथमच अच्छे दिन प्राप्त झाल्याचे दिसून आले आहे. गोल्ड ईटीएफला मिळणाऱ्या पसंतीच्या पार्श्वभूमीवर एप्रिल२०२० अखेरीस या फंडांतील एकूण निधी ९,१९८ कोटी रुपयांवर पोहोचली आहे.
