कोल्हापूर: कोल्हापुरात पावसाने जोर धरल्याने येथील पेरणीच्या कामांना वेग आला आहे. भाजप खासदार स्वत:च्या शेतातून घरी येत असताना त्यांना आजूबाजूच्या शेतातील परेणीची कामे सुरू असलेली दिसली. हे दृश्य पाहून त्यांना राहवलं नाही आणि त्यांनी चक्क शेतात जाऊन तिफनी ओढली. मात्र तोंडाला मास्क लावलेलं असल्यानं त्यांचा श्वास फुलल्याने त्यांनी मास्क काढून तिफनी ओढली. संभाजी राजे यांचा हा व्हिडिओ सोशल मीडियावर चांगलाच व्हायरल झाला आहे. छत्रपती संभाजी राजे यांनी ट्विट करून स्वत: ही माहिती दिली आहे. कोल्हापुरातील केर्ली परिसरातील मी स्वतःच्या शेतातून घरी येत असताना, वाटेत एक संपूर्ण कुटुंब शेतात पेरणी करत असताना दिसले. गाडी पुढे गेली, पण मला ते दृश्य पाहून राहवलं नाही. परत गाडी वळवली आणि त्यांच्याकडे गेलो. सुरुवातीला संकोच वाटला की मी कसा जाऊ? त्यांना कसं विचारू? परंतु, न कळत मी त्यांच्या रानात ओढला गेलो, असं सांगतानाच शेतकऱ्याच्या पायाला भेगा का पडतात? स्वतःच्या घामाने धरतीला भिजवून जगाला पोसणाऱ्या बळीराजाला किती कष्ट सोसावे लागतात? याचा अनुभव घेता आला. तिफणीला ओढताना एका फेरीतच माझा श्वास फुलून गेला, मला लगेच मास्क काढून ठेवावा लागला, असं संभाजी राजे यांनी ट्विटमध्ये म्हटलं आहे. करोनामुळे संपूर्ण जग थांबलं. पण बळीराजाला थांबून चालणार नाही, अन् तो थांबणारही नाही. हा अनुभव मला समृद्ध करून गेला. जगाच्या पोशिंदा शेतकरी राजाचे संपूर्ण जगाने ऋण व्यक्त करत त्यांचा सन्मान केला पाहिजे. (अंग मेहनतीचे काम नसताना, इतरवेळी सर्वांनी मास्क वापरणे गरजेचे आहे.), अशी भावनाही त्यांनी व्यक्त केली आहे. संभाजी राजे यांनी तिफणी ओढतानाचा व्हिडिओही ट्विटरवर शेअर केला असून सध्या या व्हिडिओची जोरदार चर्चा सुरू आहे.
