मुंबई: करोनाच्या पार्श्वभूमीवर मुंबईच्या रेल्वे स्थानकातून दररोज प्रवास करणाऱ्या हजारो प्रवाशांचा ताप तपासणं महाकठिण काम असल्याने रेल्वेने नव्या तंत्राचा आधार घेतला आहे. असं या स्क्रीनिंगच्या नव्या पद्धतीचं नाव आहे. या तंत्राद्वारे कोणत्याही प्रवाशाच्या अंगाला हात न लावता, प्रवाशाला न थांबवता त्याच्या शरीरातील तापमान मोजलं जात आहे. छत्रपती शिवाजी महाराज टर्मिनस आणि लोकमान्य टिळक टर्मिनस या गर्दीच्या रेल्वे स्थानकात ही नवी टेक्नॉलॉजी बसवली आहे. FebriEye थर्मल कॅमेऱ्यात मोठं क्षेत्रं व्यापलं जातं. त्याच्या द्वारे चालत्या फिरत्या प्रवाशांच्या शरीरातील तापमानही मोजलं जातं. एकाचवेळी अनेक प्रवाशांच्या शरीरातील तापमान मोजण्याची क्षमता या तंत्रात असल्याचं मध्य रेल्वेचे सीपीआरओ शिवाजी सुतार यांनी सांगितलं. सध्या सीएसएमटी आणि लोकमान्य टिळक टर्मिनसवरून मेल आणि एक्सप्रेसने गावाला जाणाऱ्या प्रवाशांचे प्लॅटफॉर्मवर जाण्यापूर्वी या तंत्राद्वारे तापमान मोजले जात आहे. दोन्ही रेल्वे स्थानकाच्या प्रवेशद्वारावरच FebriEye थर्मल कॅमेरा बसविण्यात आला आहे. तसेच या दोन्ही स्थानकावर ड्युटीवर येणाऱ्या अधिकारी आणि कर्मचाऱ्यांची तपासणीही या तंत्राद्वारेच केली जात आहे.
