ठाणे: राष्ट्रवादी काँग्रेसचे नेते आणि गृहनिर्माण मंत्री यांनी इंधन दरवाढीवरून काल अभिनेता अक्षय कुमारला तीन सवाल केल्यानंतर आव्हाड यांनी आज याच मुद्द्यावरून महानायक यांनाही घेरले आहे. तुम्ही आता पेट्रोल पंपावर कारमध्ये इंधन भरत नाहीत का? पेट्रोल भरल्यानंतर बिलही पाहत नाही का?; असा खोचक सवाल आव्हाड यांनी बच्चन यांना केला आहे. ( jitendra awhad amitabh bachchan ) जितेंद्र आव्हाड यांनी ट्विट करून थेट अमिताभ बच्चन यांनाच घेरले आहे. तुम्ही पेट्रोल पंपावर कारमध्ये इंधन भरत नाहीत का? तुमच्या हातात येणारं इंधनाचं बिलही तुम्ही पाहत नाही का? आता तुम्ही बोललंच पाहिजे. हीच ती वेळ आहे. ती निश्चितच पक्षपाती नसाल, असा चिमटाही आव्हाड यांनी बच्चन यांना काढला आहे. डिझेल आणि पेट्रोलचे दर गगनाला भिडले आहेत. अब मुंबईकर क्या करे कार जलाये या कार चलाये? असा अमिताभ यांच्याच स्टाइलमध्ये खोचक सवालही त्यांनी केला आहे. हे ट्विट करताना आव्हाड यांनी बच्चन यांना त्यांच्या २४ मे २०२१च्या एका ट्विटचीही आठवण करून दिली आहे. तेव्हा पेट्रोल ७.५ रुपयांनी महागले होते. त्यावर अमिताभ यांनी एक जोक तयार करून ट्विट केला होता. त्यात पेट्रोल विक्रेता म्हणतो, कितीचं पेट्रोल टाकू. त्यावर वैतागलेला मुंबईकर म्हणतो, दोन-चार रुपयाचं पेट्रोल कारवर टाक. कार जाळायची आहे. अमिताभ यांचं हे ट्विट त्यावेळी खूपच व्हायरल झालं होतं. या ट्विटमधून तत्कालीन काँग्रेस आघाडी सरकारवर खोचक टीका करण्यात आली होती. आज मोदी सरकारच्या काळात इंधनाचे दर आवाक्याबाहेर गेलेले असतानाही अमिताभ यांनी मौन धारण केले आहे. त्यामुळे आव्हाड यांनी अमिताभ यांना त्यांच्याच जुन्या ट्विटची आठवण करून देत मौन सोडण्याचं आवाहन केलं आहे. आव्हाड यांनी काल अक्षय कुमार यांनाही इंधन दरवाढीवरून खोचक प्रश्न विचारले होते. 'अक्षय, तू ट्विटरवर सक्रिय नाहीस का?... तू कार वापरणं बंद केलंस का?... तू वर्तमानपत्र वाचत नाहीस का?... तुझ्या माहितीसाठी सांगतो की देशात पेट्रोल, डिझेलच्या किंमती प्रचंड वाढल्या आहेत,' असं आव्हाड यांनी आपल्या ट्विटमध्ये म्हटलं होतं. अक्षय कुमारनं सध्याच्या महागाईवरही व्यक्त व्हावं, अशी अपेक्षा त्यांनी या माध्यमातून व्यक्त केली होती. त्यामुळे आव्हाड आता काँग्रेसच्या काळात इंधन दरवाढीवरून घेरणाऱ्या सेलिब्रिटींना रोज डिवचण्याचा प्रयत्न करत असल्याचं दिसून येत आहे. त्यावेळी अभिनेते अनुपम खेरसह अनेकांनी ट्विट करून इंधन दरवाढीविरोधात संताप व्यक्त केला होता.
