मुंबई : आज सलग पाचव्या दिवशी आयटी आणि वित्तीय शेअर्सच्या नेतृत्वाखाली भारतीय शेअर बाजाराने वृद्धी दर्शवली. निफ्टीने १० हजारांच्या पुढची पातळी कायम राखली. तो ३६ अंकांनी वधारला आणि १०,७९९.६५ अंकांवर स्थिरावला. बीएसई १८७.२४ अंकांनी वाढला व ३६६७४ अंकावर विसावला. चलन बाजारात रुपया अमेरिकी डॉलरच्या तुलनेत ७४.९३ रुपयांवर बंद झाला. गुंतवणूकदारांनी विदेशी भांडवल बाजारांतील चढउताराकडे फारसे लक्ष न देता गुंतवणूक केल्यामुळे बाजार वर गेले. विदेशी भांडवलाचा ओघ कायम राहील आणि देशात मान्सून चांगल्या प्रकारे सक्रिय राहील, या आशेवर भांडवल बाजार स्वार झालेला दिसला. सेन्सेक्स ठरवणाऱ्या कंपन्यांपैकी बजाज पायनान्सला सर्वाधिक फायदा झाला. या कंपनीचा समभाग ८ टक्के वधारला. त्याखालोखाल इंडसइंड बँक, बजाज फिनसर्व्ह, इन्फोसिस, आयसीआयसीआय बँक, अॅक्सिस बँक आणि एचसीएल टेक या कंपन्यांचे समभाग वधारले. त्याचवेळी एनटीपीसी, आयटीसी, पॉवरग्रीड आणि टाटा स्टील या कंपन्यांच्या समभागांना तोटा सहन करावा लागला. सलग पाचव्या सत्रात बाजारात तेजी आहे. निफ्टीने चार महिन्यांची उच्चांकी स्तर गाठला आहे. निफ्टीत वाढ झाली तर १०८५० ते १०९०० च्या स्तराला मर्यादा असेल. जर त्यात घसरण झाली तर १०५७० पर्यंत मर्यादित राहील, असे चॉईस ब्रोकिंगचे सुमित बगाडिया यांनी सांगितले. जगभरात कोव्हिड-१९ च्या रुग्णांमध्ये वाढ होत असल्याने गुंतवणूकदारांवर याचा परिणाम झाला असे एंजल ब्रोकिंग लिमिटेडचे प्रमुख सल्लागार अमर देव सिंह यांनी सांगितले. अमेरिकेत नॅसडॅकचे शेअर्स २.२१ टक्क्यांनी वाढले. कोव्हिड-१९ च्या रुग्णसंख्येत वाढ झाल्याने जागतिक बाजारात नकारात्मक ट्रेंड दिसून आला. त्यामुळे युरोपियन बाजारातही घसरण दिसून आली. एफटीएसई एमआयबी ०.१३ टक्के, 'एफटीएसई १००' १.३१ टक्के, 'निक्केई २२५'चे शेअर्स ०.४४ टक्के तर हँगसेंगचे शेअर्स १.३८ टक्के नी खाली घसरले. आरोग्य मंत्रालयाने सोमवारी प्रसिद्ध केलेल्या माहितीनुसार, देशात एकूण करोनाबाधित रुग्णांची संख्या ६ लाख ९७ हजार ४१३ वर पोहोचली आहे. यां रुग्णांपैकी १९ हजार ६९३ रुग्णांचा मृत्यू झाला आहे.करोनाबाबतची एक धक्कादायक आकडेवारी समोर आली आहे. मुंबईतील करोना रुग्णांची संख्या आणि मृतांची आकडेवारी चीनपेक्षाही अधिक असल्याची माहिती समोर आल्याने आरोग्य यंत्रणेच्या तोंडचं पाणी पळालं आहे.
