मुंबई: आता मुंबईत डॉक्टरच्या सल्ल्याशिवाय करोनाची चाचणी करता येणार आहे. त्यामुळे प्रिस्क्रिप्शनशिवाय करोनाची चाचणी करण्यास परवानगी देणारं मुंबई हे देशातील पहिलं शहर ठरलं आहे. करोनाचे लवकर निदान झाल्यास वेळेत उपचार सुरू करणे शक्य झाल्याने संबंधित रुग्ण लवकर बरा होण्याची संभाव्यता अधिक असते. ही बाब लक्षात घेऊन व क्षेत्रातील कोविड विषयक वैद्यकीय चाचणी करण्याची खासगी प्रयोगशाळांची वाढलेली संख्या व क्षमता लक्षात घेत मुंबई महापालिका क्षेत्रातील खासगी प्रयोगशाळांना डॉक्टरांच्या लिखित सल्ल्याशिवाय म्हणजेच डॉक्टरांच्या 'प्रिस्क्रीप्शन' शिवाय कोविड विषयक वैद्यकीय चाचणी करण्याची परवानगी देण्याचा निर्णय महापालिका आयुक्त इकबाल सिंह चहल यांनी घेतला आहे. या निर्णयामुळे आता महापालिका क्षेत्रातील खासगी वैद्यकीय प्रयोगशाळांमध्ये कोविड विषयक चाचणी ही थेटपणे संपर्क साधून करवून घेता येणार आहे. यानुसार खासगी प्रयोगशाळांमधून चाचणी करण्यासाठी शासनाने निर्धारित केलेले दर लागू असतील, अशी माहिती महापालिकेच्या सार्वजनिक आरोग्य खात्याद्वारे देण्यात आली आहे. मुंबईतील १७ खाजगी वैद्यकीय प्रयोगशाळांना कोविड विषयक वैद्यकीय चाचणी करण्याची परवानगी केंद्रशासनाद्वारे देण्यात आली आहे. यानुसार निर्धारित करण्यात आलेल्या खासगी वैद्यकीय प्रयोगशाळांमध्ये कोविड विषयक वैद्यकीय चाचणी करण्यासाठी यापूर्वी डॉक्टरांचे प्रिस्क्रीप्शन असणे गरजेचे होते. मात्र ही अट आता काढून टाकण्यात आली आहे. ज्यामुळे नागरिकांना त्यांची कोविड विषयक चाचणी सहजपणे करवून घेणे शक्य होणार आहे. सदर चाचणी पॉजिटीव्ह आल्यास महापालिकेच्या विभागस्तरीय 'वॉर रुम'द्वारे बेड अलॉअमेंट करण्यात येणार आहे. ज्यामुळे रुग्णावर पूर्वीच्या तुलनेत अधिक लवकर वैद्यकीय औषधोपचार करणे शक्य होणार आहे, असं पालिकेने स्पष्ट केलं आहे. मुंबईतील खासगी वैद्यकीय प्रयोगशाळांमधून कोविड विषयक चाचणी करण्यासाठी शासनाने यापूर्वी लागू केलेल्या निर्धारित दरांनुसार प्रती चाचणी रुपये २ हजार ५०० एवढे शुल्क आकारले जाणार आहे. तर वैद्यकीय चाचणीसाठीचे नमूने हे संबंधित व्यक्तीच्या घरी जाऊन घेतल्यास त्यासाठी प्रती चाचणी रुपये २ हजार ८०० एवढे शुल्क आकारले जाणार असल्याची माहितीही पालिकेने दिली आहे. याचबरोबर संस्थात्मक विलगीकरणात असणा-या रुग्णांना डिस्चार्ज देण्यापूर्वी त्यांची कोविड विषयक वैद्यकीच चाचणी नकारात्मक (निगेटिव्ह) येणे आवश्यक आहे. याचाच अर्थ, कोविड विषयक चाचणी नकारात्मक आल्याशिवाय रुग्णाला संस्थात्मक विलगीकरणातून डिस्चार्ज दिला जाणार नाही, असेही महापालिकेच्या सार्वजनिक आरोग्य खात्याद्वारे कळविण्यात आले आहे. चाचणीसाठीची परवानगी देण्यात आलेल्या प्रयोगशाळा थायरोकेअर, सबर्बन, एच एन रिलायन्स, मेट्रोपोलिस, एसआरएल, इन्फेक्सएन, कोकीलाबेन, एसआरएल फडके, इग्नेटिक्स, पीडी हिंदुजा, क्वॉलिलाइफ डायग्नोस्टिक, डॉ. जरीवाला, नानावटी, सनफ्लॉवर, एनएम मेडिकल, जसलोक आणि लाइफ केअर डायग्नोस्टिकमध्ये ही चाचणी करता येणार आहे.
