दमास्कस : जगातील दोन शक्तीशाली देश असलेले रशिया आणि अमेरिकेच्या सैन्यांमध्ये सीरियात तीव्र संघर्ष झाल्याचे समोर आले आहे. या संघर्षात काही सैन्य जखमी झाले आहेत. यु्द्धाच्या झळा सहन करत असलेल्या सीरियात अमेरिका-रशियाच्या सैन्यांमध्ये हा संघर्ष झाला. रशियन सैन्याच्या एका गटाकडून आर्मर्ड व्हेइकलने अमेरिकन सैन्याला धडक दिली. त्यानंतर या सैन्यांमध्ये हाणामारी झाली असल्याचे वृत्त आहे. यामध्ये चारजण जखमी झाले आहेत. अमेरिकन सैन्यासोबत हाणामारी सुरू असताना रशियाने आपल्या हेलिकॉप्टरचाही वापर केला असल्याचे एका व्हिडिओत समोर आले आहे. अमेरिकेच्या सेंट्रल कमांडने दिलेल्या माहितीनुसार, ही घटना २५ ऑगस्ट रोजी सकाळी १० वाजण्याच्या सुमारास घडली. त्यांनी सांगितले की, उत्तर पूर्व सीरियात अमेरिकन आणि रशियन सैन्य समोरासमोर आले. त्यावेळी त्यांच्यात वाद झाले. त्यातच रशियन आर्मर्ड व्हेइकलने अमेरिकेच्या आर्मर्ड व्हेइकलला धडक दिली. यामध्ये काही सैनिक जखमी झाले. तणाव कमी होण्यासाठी त्या भागातून अमेरिकन सैन्याने माघार घेतली असल्याचेही अमेरिकेने स्पष्ट केले. वाचा: अमेरिका आणि रशियातील संघर्ष रोखण्यासाठी तयार करण्यात आलेल्या नियमांचे रशियाने उल्लंघन केले असल्याचा आरोप अमेरिकेने केला आहे. आम्हाला तणाव वाढवण्याची इच्छा नाही. मात्र, कोणत्याही आक्रमकतेला प्रत्युत्तर देण्यास आम्ही सज्ज असल्याचेही अमेरिकेने म्हटले. वाचा: अमेरिका-रशियाच्या सैन्यामध्ये जोरदार राडा झाला असल्याचे म्हटले जात आहे. अमेरिकेच्या आर्मर्ड व्हेइकलने रशियाच्या आर्मर्ड व्हेइकलसह असणाऱ्या गस्ती पथकाला अडवण्याचा प्रयत्न केला असल्याचे व्हिडिओत दिसत आहे. अमेरिकन सैन्याला दाद न देता रशियन सैन्याने पुढे जात होते. त्या दरम्यान एका अमेरिकन आर्मर्ड व्हेइकलला रशियन आर्मर्ड व्हेइकलने धडक दिली. अमेरिकन सैनिकांना पळवून लावण्यासाठी रशियाचे हेलिकॉप्टरही तातडीने त्या ठिकाणी दाखल झाले. अमेरिका व रशियन सैन्यामध्ये सीरियात हाणामारी, संघर्ष कायमच होत असल्याचे अधिकारी सांगतात. मात्र, ही घटना अतिशय गंभीर असल्याचे तज्ञ सांगतात. अमेरिकन सैन्यासोबत नेहमीच सीरिया डेमोक्रेटीक फोर्सेसचे जवान असतात. दरम्यान, बेलारूसमध्ये एकीकडे नागरिकांचे आंदोलन सुरू असताना दुसरीकडे रशिया आणि नाटो दरम्यान तणाव वाढत चालला आहे. रशियाने बेलारूसचे राष्ट्रपती अलेक्झांडर लुकाशेन्को यांना पाठिंबा दिला आहे. तर, दुसरीकडे नाटो देशांकडून त्यांना विरोध सुरू आहे. जवळपास २६ वर्ष सत्तेवर असलेल्या लुकाशेन्को यांना नाटो देश सत्तेवरून हटवण्याचा प्रयत्न करत आहे. यामुळे रशिया आणि नाटो देशांमध्येही तणाव वाढत आहे. या वाढत्या तणावाच्या पार्श्वभूमीवर अमेरिकेने आता आपली सहा बी-५२ क्षेपणास्त्र डागणारी लढाऊ विमाने पाठवली आहेत.
