मुंबई : मागील दोन सत्रात भांडवली बाजारात तेजीची लाट धडकली आहे. शुक्रवारी सेन्सेक्स ८३५ अंकांनी तर सोमवारी तो ५९५ अंकांनी वधारला आहे. या दोन सत्रात गुंतवणूकदारांचे नुकसान भरून निघाले आहे. सध्या बाजारात निर्देशांकांच्या वाढीसाठी पोषक वातावरण असल्याचे विश्लेषक सांगतात. आणखी काही सत्रे बाजारात तेजीचे वारे वाहतील, असा अंदाज विश्लेषकांनी व्यक्त केला आहे. बाजारात अशी तेजी कायम राहीली तर राष्ट्रीय शेअर बाजाराचा निफ्टी ११४०० ते ११५०० अंकांपर्यंत मजल मारेल, असा अंदाज एचडीएफसी सिक्युरिटीजचे विश्लेषक नागराज शेट्टी यांनी व्यक्त केला. त्यात घसरण झाल्यास निफ्टी ११०५० पर्यंत स्थिरावेल, असे शेट्टी यांनी सांगितले. जिओजित फायनान्शिअल सर्व्हिसेसचे शेअर बाजार विश्लेषक विनोद नायर सांगतात की दोन सत्रातील मोठ्या तेजीनंतर ट्रेडर्सकडून नफावसुली होण्याची शक्यता आहे. तर गुंतवणूकदारांनी सावध रहावे. मोतीलाल ओसवालचे चंदन तपारिया यांच्या अंदाजानुसार निफ्टी १११११ अंकांवरून ११४५० अंकांपर्यंत मजल मारू शकेल. दरम्यान, सोमवारी अमेरिकेतील शेअर बाजारांमध्ये तेजी दिसून आली. डाऊ जोन्स ३५२ अंकांवर वधारला. एस अँड पी ५०० निर्देशांक ३८.९५ अंक आणि नॅसडॅक १२२ अंकांनी वधारला. चीनमधील औद्योगिक उत्पादनात सुधारणा झाली आहे. त्यामुळे युरोपातील भांडवली बाजारांत सकारात्मक परिणाम दिसून आले. एसटीओएक्सएक्स निर्देशांक १.७ टक्क्यांनी वधारला. ज्यात बँकिंग इंडेक्स ४.१ टक्के वधारला. वाचा : आजच्या सत्रात एफडीसी , एस्कॉर्ट, बाळकृष्ण इंडस्ट्री, ग्रॅन्युले इंडिया, गरवारे टेक्निकल या शेअरमध्ये सोमवारी मोठी खरेदी दिसून आली. त्यामुळे या शेअरपैकी बहुतांश शेअरने वर्षभराचा उच्चांक गाठला. तर रिलायन्स, बजाज फायनान्स, इंडसइंड बँक, डॉ. रेड्डी लॅब, टीसीएस, पीव्हीआर, एचसीएल, इन्फोसिस, एचडीएफसी बँक आदी शेअरमध्ये मोठ्या प्रमाणात उलाढाल दिसून आली. रिझर्व्ह बँकेने पतधोरण समितीची बैठक पुढे ढकलली आहे. त्याशिवाय आज किरकोळ कर्जदारांना देखील आणखी आठवडाभर दिलासा मिळाला आहे. सर्वोच्च न्यायालयाने आज EMI Moratorium वरील सुनावणी आणखी आठ दिवस पुढे ढकलली आहे. दरम्यान, चलन बाजारात सोमवारी डॉलरच्या तुलनेत रुपयाने दमदार कामगिरी केली. दुपारी रुपया २८ पैशांनी वधारून ७३.६१ पर्यंत मजबूत झाला. बाजार बंद होताना सेन्सेक्स ५९२ अंकांनी वधारून ३७९८१ अंकांवर बंद झाला. १७७ अंकांनी वधारून ११२२७ अंकांवर स्थिरावला होता.
