मुंबई : एक दिवसाच्या विश्रांतीनंतर पेट्रोलियम कंपन्यांनी आज पुन्हा एकदा इंधन दरात वाढ केली. आज गुरुवारी पेट्रोलियम कंपन्यांनी पेट्रोल दरात ११ पैसे तर डिझेलमध्ये २१ पैसे वाढ केली आहे. याआधी बुधवारी दोन्ही इंधनाचे दर जैसे थे ठेवले होते. आजच्या दरवाढीने आज मुंबईत पेट्रोलचा भाव प्रती लीटर ८८.४० रुपये आणि डिझेल ७८.१२ रुपये झाला आहे. दिल्लीत आजचा पेट्रोलचा भाव ८१.७० रुपये असून डिझेल ७१.६२ रुपये आहे. चेन्नईत पेट्रोल ८४.७४ रुपये असून डिझेल ७७.०८ रुपये आहे. कोलकात्यात पेट्रोल ८३.२६ रुपये आहे. डिझेलचा भाव ७५.१९ रुपये प्रती लीटर झाला आहे. येत्या ३० नोव्हेंबरला ओपेक देशांच्या सदस्यांची बैठक होणार आहे. करोना लस, युरोपात पुन्हा लॉकडाउनची शक्यता आणि उत्पादन कपात यावर या बैठकीत निर्णय होणार आहे. त्यामुळे मागील महिनाभरापासून ४० डॉलरवर स्थिर असलेला कच्च्या तेलाचा भाव आता ४५ डॉलरच्या आसपास गेला आहे. युरोपात पुन्हा लॉकडाउन केल्याने इंधन मागणीत मोठी घट होण्याची शक्यता आहे. त्यामुळे युरोपातील रिफायनरी तात्पुरत्या बंद ठेवण्याचा विचार केला जात आहे. आज गुरुवारी सिंगापूरमध्ये ब्रेंट क्रूड ऑइलचा भाव ११ सेंट्सने वाढून प्रती बॅरल ४६.८२ डॉलर झाला. त्याचबरोबर यूएस वेस्ट टेक्सास क्रूडचा भाव ११ सेंटसने वधारून ४८.६१ डॉलर इतका झाला. क्रूडचा भाव तीन महिन्यांच्या उच्चांकी स्तरावर आहे. सोमवारी दोन्ही तेलाच्या किमतीत अनुक्रमचे २ टक्के आणि ५ टक्के वाढ झाली होती. जागतिक बाजारात कच्च्या तेलाच्या प्रती बॅरलमध्ये एक डॉलरची वाढ झाल्यास किरकोळ ग्राहकांसाठी प्रती लीटर इंधन दरात ४० पैसे वाढ होते. मागील जवळपास दोन महिने तेलाचा भाव ३८ ते ४० डॉलर प्रती बॅरल होता. कारण आठवडाभरात कच्च्या तेलाचा ४५ डॉलरवर गेला. त्यामुळे पेट्रोलियम कंपन्यांनी ४८ दिवसांनंतर शुक्रवारी पेट्रोल आणि डिझेल दरात वाढ केली होती.
