मुंबई : जगभरातील भांडवल बाजारात आणखी काही काळ मोठ्या प्रमाणावर चढउतार दिसून येणार आहेत. त्यामुळे दीर्घकालीन गुंतवणुकीसाठी सोने सुरक्षित असल्याची भावना गुंतवणूकदारांमध्ये आहे. त्यामुळे सोने आणि चांदीमध्ये मागील दोन सत्रात तेजी दिसून आली आहे. आज सोमवारी कमॉडिटी बाजारात सोने आणि चांदीच्या किमतीत वाढ झाली. आज सकाळी बाजार उघडताच सोने ५० रुपयांनी वधारले. तर चांदीमध्ये ७५० रुपयांची वाढ झाली. सध्या मल्टी कमॉडिटी एक्सचेंजमध्ये सोन्याचा भाव प्रती १० ग्रॅम ५०६७५ रुपये आहे. चांदीचा भाव एक किलोला ६१४४३ रुपये असून त्यात ५७८ रुपयांची वाढ झाली आहे. goodreturns.in या वेबसाईटनुसार सोमवारी मुंबईत २२ कॅरेट सोन्याचा भाव प्रती १० ग्रॅम ४९९७० रुपये आहे. तर २४ कॅरेटचा भाव ५०९७० रुपये आहे. दिल्लीत २२ कॅरेटचा भाव ४९९२० रुपये असून २४ कॅरेटचा भाव ५१९५० रुपये आहे. कोलकात्यात ग्राहकांना २२ कॅरेट सोने खरेदीसाठी ४८९२० रुपये मोजावे लागत आहेत. तर २४ कॅरेटचा भाव ५२५४० रुपये आहे. चेन्नईत २२ कॅरेट सोने प्रती १० ग्रॅमसाठी ४७६२० रुपये आहे. २४ कॅरेटसाठी तो ५१९५० रुपये आहे. जवळपास आठ महिन्यानंतर अनेक भांडवल बाजार कोविडपूर्व स्थितीत आले आहेत. मात्र युरोपात काही ठिकाणी करोनाची दुसरी लाट आल्याचे वृत्त आहे. त्यामुळे पुन्हा एकदा गुंतवणूकदारांची भांडवल बाजाराच्या स्थैर्याविषयीची भीती वाढली आहे. त्यामुळे मौल्यवान धातूंमधील गुंतवणुकीकडे त्यांचा अधिक ओढा आहे. करोना संसर्गामुळे अर्थव्यवस्थेची झालेली धीमी गती, वेतनकपात, रोजगारकपात यांमुळे आलेली आर्थिक अनिश्चतता या सर्वांचा परिणाम म्हणून लोकांना ओढा सोन्याकडे वाढत आहे. मात्र प्रत्यक्ष सोने बाळगताना जोखीम उचलावी लागते. ही बाब ध्यानात घेऊन सोन्यातील गुंतवणूक गोल्ड ईटीएफच्या माध्यमातून करण्याचे धोरण सर्वसामान्यांनी अवलंबलेले दिसत आहे. जागतिक बाजारात सोन्याचा भाव प्रती औंस १८७३ डॉलर आहे. एक औंस चांदीचा भाव २३.३२ डॉलर आहे. डॉलरचे अवमूल्यन, करोनाची दुसरी लाट आणि अमेरिकेतील निवडणूक या घडामोडी सोने आणि चांदीवर परिणाम करत असल्याचे कमॉडिटी विश्लेषकांचे म्हणणे आहे.
