लंडन: करोनाच्या संसर्गाला अटकाव करण्यासाठी ब्रिटन आणि अमेरिकेने लसीकरण मोहीम सुरू केल आहे. त्यानंतर आता युरोपीय महासंघात रविवारपासून लसीकरण मोहीम सुरू करण्यात आली आहे. पहिल्या टप्प्यात रविवारी वैद्यकीय कर्मचारी, नर्सिंग होममधील कर्मचारी आणि नेत्यांना लस देण्यात येत आहे. युरोपीय महासंघाच्या आयोगाच्या अध्यक्ष उर्सुला वॉन डेर लेन यांनी लसीकरण मोहिमेचा एक व्हिडिओ शेअर केला आहे. त्यात, ‘या शतकातील सर्वाधिक आरोग्य संकटात आणणाऱ्या करोना साथीचा सामना करण्यात आणि ४५ कोटी लोकांचा जीव वाचविण्यात दाखविलेली एकी हृदय स्पर्शून जाणारी आहे,’ असे म्हटले आहे. युरोपीय महासंघाच्या आधी जर्मनी, हंगेरी आणि स्लोवाकियामध्ये शनिवारी लसीकरणास सुरुवात झाली आहे. युरोपीय महासंघाच्या २७ देशांत करोना रुग्णांची एकूण संख्या १.६ कोटी इतकी असून, आतापर्यंत या साथीने तीन लाख ३६ हजार रुग्णांचा मृत्यू झाला आहे. करोना संसर्गाच्या पहिल्या लाटेचा मोठा फटका युरोपीयन देशांना बसला होता. युरोप करोना संसर्गाचे मुख्य केंद्र झाले होते. इटली, स्पेन आदी देशांची आरोग्य व्यवस्था कोलमडून पडली होती. सक्तीचे लॉकडाउन आणि निर्बंधांमुळे युरोपात बऱ्यापैकी करोनाला अटकाव करण्यात आला. मात्र, करोनाच्या दुसऱ्या लाटेमुळे अनेक देशांची चिंता वाढवली आहे. दरम्यान, करोनाच्या थैमानाला अटकाव करण्यासाठी ब्रिटन, अमेरिका, रशियामध्ये लसीकरण सुरू करण्यात आले असताना दुसरीकडे करोनाच्या नव्या प्रकाराने आणखी चिंता वाढवली आहे. नुकत्याच करण्यात आलेल्या एका अभ्यासानुसार, करोनाचा नवा स्ट्रेन हा वेगाने फैलावत आहे. त्यामुळे पुढील वर्षी करोनाबाधितांच्या संख्येत वाढ होण्याची भीती असून रुग्णालयांत जागा कमी पडेल अशी परिस्थिती निर्माण होण्याची शक्यता आहे. करोनाबाधितांच्या मृतांची संख्या वाढण्याचा धोका आहे. वाचा: 'ब्लूमबर्ग'च्या एका अहवालानुसार, लंडन स्कूल ऑफ हायजीन अॅण्ड ट्रॉपीकल मेडिसीनच्या सेंटर फॉर मॅथमॅटिकल मॉडलिंग ऑफ इन्फेक्शियस डिसीजने याबाबत एक संशोधन केले आहे. त्यांच्या संशोधनानुसार, करोनाचा नवा स्ट्रेन हा इतर स्ट्रेनच्या तुलनेत ५६ टक्के अधिक संसर्गजन्य आहे. मात्र, अद्यापही या नव्या स्ट्रेनमुळे गंभीर आजार झाल्याचे सबळ पुरावा नाही.
