वॉशिंग्टन: अनेक देशांमध्ये गांजाचे सेवन करणे बेकायदेशीर असले तरी अमेरिकेने आपल्या कायद्यात बदल केला आहे. गांजाचे सेवन करण्यास, त्याच्या वापरास कायदेशीर ठरवण्याबाबतचा प्रस्ताव अमेरिकन संसदेच्या कनिष्ठ सभागृहात मान्य करण्यात आला आहे. या प्रस्तावाच्या बाजूने २२८ तर विरोधाच्या बाजूने १६४ मते पडली. हे विधेयक मंजूर झाल्यामुळे सेवन करणाऱ्या अमेरिकेतील नागरिकांना दिलासा मिळाला आहे. अमेरिकेतील राज्य आणि संघीय कायद्यात समानता आणण्याच्या दिशेने हे पाऊल महत्त्वाचे समजले जात आहे. या विधेयकाला कायद्याचे स्वरुप प्राप्त झाल्यानंतर गांजाला हेरॉईन आणि कोकेनसारख्या अंमली पदार्थाच्या यादीतून वगळण्यात येणार आहे. अमेरिकेतील संघराज्यांच्या नियमांनुसार, अनेक राज्यांमध्ये औषध म्हणून गांजाचा वापर करण्यास बंदी आहे. इतकेच नव्हे तर कोलोराडोसारख्या काही राज्यांमध्ये गांजाच्या वापरावर असलेली बंदी हटवली आहे. अमेरिकेत मागील पाच दशकांपासून गांजाच्या वापरास कायदेशीर मान्यता देण्याची मागणी केली जात आहे. अमेरिकेतील जवळपास १५ राज्यांमध्ये गांजाचे सेवन मनोरंजनासाठी करण्यास बंदी आहे. तर, जवळपास ३० राज्यांमध्ये औषधांमध्ये गांजाचा वापर करण्यास मंजुरी आहे. वाचा: हे विधेयक पूर्णपणे मंजूर झाल्यास गांजा सेवन करणे बेकायदेशीर कृत्य असणार नाही. त्याशिवाय गांजावरील उत्पादनावर पाच टक्के कर लावता येणार आहे. वाचा: वाचा: मार्गात अजूनही अडथळे गांजा सेवन करण्यावरील बंदी पूर्ण हटवण्याच्या मार्गात अजूनही काही अडथळे आहेत. अमेरिकन संसदेच्या कनिष्ठ सभागृहात डेमोक्रॅटीक पक्षाचे बहुमत असले तरी वरिष्ठ सभागृहात रिपब्लिकन पक्षाचे बहुमत आहे. रिपब्लिकन पक्षाने या विधेयकाला विरोध केला आहे. त्यामुळे वरिष्ठ सभागृहात विधेयक मंजूर करण्यासाठी डेमोक्रॅटीक पक्षाला व्यूहरचना आखावी लागणार अथवा सभागृहात बहुमत मिळेपर्यंत काही महिन्यांची प्रतिक्षा करावी लागेल.
