मुंबई : तेजीच्या लाटेत राष्ट्रीय शेअर बाजाराच्या निफ्टीकडे विश्लेषकांच्या नजरा लागल्या आहेत. निफ्टीने मंगळवारी १३४०० ची पातळी ओलांडली होती. मात्र त्या पातळीवर स्थिरावण्यात निर्देशांकाला अपयश आले. सलग सात सत्रात दोन्ही निर्देशांक वधारले आहेत. त्यामुळे नफा वसुलीची शक्यता काही विश्लेषकांनी व्यक्त केली आहे. आज १३४०० चा स्तर ओलांडेल का याची बाजाराला उत्सुकता आहे. दरम्यान, आज आशियातील शेअर बाजारांनी सकारात्मक सुरुवात केली आहे. हँगसेंग, शांघाय कॉम्पोझिट इंडेक्स आणि निक्केई या शेअर बाजारात सध्या तेजी आहे. त्यामुळे भारतीय बाजारात देखील सकारात्मक सुरुवात करतील, असा अंदाज व्यक्त होत आहे. शेअर बाजाराच्या आकडेवारीनुसार मंगळवारी परदेशी संस्थामक गुंतवणूकदारांनी २९०९ कोटींची खरेदी केली. तर स्थानिक संस्थात्मक गुंतवणूकदारांनी २६४० कोटींची विक्री केली. आज बर्गर किंग इंडिया या कंपनीचा शेअर सूचिबद्ध होणार आहे. आयपीओसाठी कंपनीने प्रती शेअर ५९-६० रुपये असा किंमत पट्टा निशिचत केला होता. आयपीओ १५६ पट सबस्क्राईब झाला. त्यामुळे शेअर चांगल्या किमतीवर सूचिबद्ध होण्याची शक्यता आहे. मंगळवारी सेन्सेक्समध्ये १६ स्टॉक्सनी नफा कमावला तर १४ स्टॉक्समध्ये घसरण दिसली. अल्ट्राटेक सिमेंट (३.१५%), टीसीएस (२.२१%), आरआयएल (१.८२%) आणि एचसीएल टेक्नोलॉजीज (१.०६%) हे टॉप गेनर्समध्ये समाविष्ट झाले. तर सन फार्मा (२.३६%), इंडसइंड बँक (२%), एनटीपीसी (१.५५%) आणि एशियन पेंट्स (१.३८%) यांनी नफ्यावर मर्यादा आणल्या.निफ्टीमध्ये अल्ट्राटेक (३.१९%), टीसीएस (२.१८%) आणि एचसीएल टेक्नोलॉजीज (०.९९%)सह विप्रो (१.४६%) आणि एसबीआयनेदेखील (०.८५%) नफा दर्शवला. हिंडाल्को (२.२१%) आणि कोल इंडिया (१.८६%) ने नुकसानीत भर टाकली. येस बँक: येस बँकेत गुंतवणुकदारांचा मोठा सहभाग दिसून आल्याने बँकेने ९.८४% चा नफा कमावला. एएमएफआय (असोसिएशन ऑफ म्युच्युअल फंड्स इन इंडिया) कडून बँकेचे अपग्रेडेशन मिडकॅप कॅटेगरीकडून लार्ज कॅपमध्ये होण्याच्या आशेमुळे हे परिणाम दिसले. एआरसीमध्ये ४०,००० कोटी बॅड लोन्स ठेवण्यात आल्याच्या वृत्तामुळेही स्टॉक्समध्ये आणखी वृद्धी दिसून आली. आदित्य बिरला कॅपिटल लिमिटेड: आदित्य बिरला कॅपिटल लिमिटेडला फायनान्समधील दिग्गज रोमेश सोब्ती यांचे समर्थन मिळण्याचा अंदाज आहे. त्यांनी इंडसइंड बँकेत यशस्वी कामगिरी केलेली आहे. आदित्य बिर्ला कॅपिटलने रिझर्व्ह बँकेकडे सोब्ती यांना मंडळात सहभागी करून घेण्याची परवानगी मागितली होती. सोब्ती हे यापूर्वी अॅडव्हेंटमध्ये त्यांचे ऑपरेटिंग पार्टनर म्हणून सहभागी झाले होते. आदित्य बिर्ला कॅपिटलमध्ये अॅडव्हेंटचा ४.१५% वाटा आहे. इंट्राडे ट्रेडमध्ये या बातमीने ०.४९% ची वृद्धी झाली.
