वृत्तसंस्था, नवी दिल्ली : भारत आणि चीन यांच्यातील संघर्षाचे एक केंद्र असलेल्या पँगाँग तळ्यामध्ये गस्त घालण्यासाठी भारत लवकरच शक्तिशाली नौका तैनात करणार आहे. या बारा गतीने करण्याच्या सूचना देण्यात आल्या आहेत. त्यामुळे या तळ्यात गस्त घालणाऱ्या भारतीय नौकांना धडक मारून त्या नादुरुस्त करण्याचे चिनी लष्कराचे डावपेच भविष्यात फुसके ठरतील. एका इंग्रजी वेबसाइटने या बाबतचे वृत्त दिले आहे. सध्या या गस्ती नौकांची बांधणी गोवा शिपयार्डमध्ये सुरू आहे. बांधणीचे काम गतीने पूर्ण करावे, अशा सूचना गोवा शिपयार्डला देण्यात आल्या आहेत, अशी माहिती सूत्रांनी दिल्याचे वृत्तात म्हटले आहे. सध्या हिवाळ्यामुळे लडाख सीमेवर शांतता असली तरी उन्हाळ्यात सीमा संघर्ष पुन्हा उफाळू शकतो, ही शक्यता गृहीत धरून भारतीय लष्कर पँगाँग तळ्याच्या परिसरात सज्जता वाढवत आहे. गोवा शिपयार्डला याच आठवड्यात गस्ती नौका बांधणीचे कंत्राट मिळाले आहे. साधारणपणे एक नौका बांधणीसाठी त्यांना एक वर्ष लागते; परंतु परिस्थिती अपवादात्मक असल्यामुळे ही प्रक्रिया गतीने पूर्ण करण्याचा आदेश देण्यात आला आहे. या नौका कशा असाव्यात, याची पाहणी करण्यासाठी नौदलाचे पथक या भागात जाऊन पाहणी करून आले. लष्कराकडूनही नेमक्या गरजांची माहिती घेण्यात आली. त्यानंतर नव्या नौकांचा आराखडा बनविण्यात आला. दृष्टिक्षेपात पँगाग तळे - १३५ चौरस किलोमीटर क्षेत्रात विस्तार - फक्त ४५ किलोमीटरचा भाग भारतात - उर्वरित भाग चीनच्या ताब्यात - हिवाळ्यात तळे गोठलेले असते संघर्षाची ठिकाणे - पँगाँग तळ्याच्या उत्तरेकडील किनाऱ्यावर तळहातासारखा भाग - तेथे बोटांप्रमाणे डोंगराचा तळभाग तळ्यात घुसलेला आहे. याला फिंगर भाग म्हणतात. - फिंगर आठही प्रत्यक्ष ताबा रेषा आहे, असे भारताचे म्हणणे - चीनच्या मते, फिंगर दोनच्या पुढे त्यांची हद्द - सध्या चिनी सैन्य फिंगर चारपर्यंत गस्त घालते सध्या काय घडते? - भारतीय लष्कर हलक्या नौकांद्वारे गस्त घालते - चिनी सैन्याकडे मजबूत बांधणीच्या मोठ्या नौका - भारतीय गस्ती पथकाच्या तुलनेत चिनी पथकाकडे दुप्पट साहधनसुविधा - चिनी नौका मुद्दाम आदळवून भारतीय नौका जायबंदी केल्या जातात कशा असतील नव्या नौका? - नौका वजनाने अधिक - बांधणी पोलादी - अधिक साधनसुविधा - भारवहन क्षमताही अधिक
