लंडन: चोरी रोखण्यासाठी विविध देशांमधील पोलीस खाते वेगवेगळ्या पद्धतीने प्रयत्नशील असते. चोरीच्या गुन्ह्यात तुरुंगवासातून बाहेर आल्यानंतर काहीजण पुन्हा एकदा गुन्हेगारीच्या मार्गावर असतात. चोरीच्या घटना रोखण्यासाठी ब्रिटनमध्ये आता नवीन पद्धत अवलंबण्यात येणार आहे. जगात पहिल्यांदाच दरोडेखोर आणि चोरांना ट्रॅक करण्यासाठी जीपीएसचा वापर करण्यात येणार आहे. यामुळे चोरांवर देखरेख ठेवणे सोपं होणार आहे. चोरांवर एक वर्ष २४ तास नजर ठेवण्यासाठी एक योजना तयार करण्यात आली आहे. न्यायिक मंत्रालयाने दिलेल्या माहितीनुसार, चोरीच्या घटना रोखण्यासाठी ही योजना तयार करण्यात आली आहे. प्रायोगिक तत्वावर सुरू झालेली ही योजना यशस्वी झाल्यास अन्य क्षेत्रातही अशी योजना सुरू करता येईल. तुरुंगातून सुटका झाल्यानंतर अनेकजण पुन्हा एकदा चोरी, दरोडेखोरीचे गुन्हा करण्यास सुरुवात करतात. जवळपास ८० टक्के प्रकरणांत संशयित आरोपींची ओळख पटवता येत नाही. ही जीपीएसची पद्धत चोर आणि दरोडेखोरांच्या अटकेसाठी एक अतिरिक्त पद्धत असणार आहे. वाचा: अशी होणार अंमलबजावणी या योजनेनुसार, चोरीच्या प्रकरणात तुरुंगातून शिक्षा पूर्ण केलेल्यांच्या पायामध्ये जीपीएस टॅग लावण्यात येईल. त्यानंतर हे जीपीएस मुख्य सर्व्हरला जोडण्यात येईल. ही पद्धत खूपच फायदेशीर ठरणार असल्याचा विश्वास अधिकाऱ्यांनी व्यक्त केला. वाचा: वाचा: सुरुवातीच्या टप्प्यात सहा पोलीस क्षेत्रांमध्ये जीपीएस टॅगचा प्रायोगिक तत्वावर वापर होईल. यामध्ये एवन, चेशायर, ग्लॉस्टरशायर, ग्वेंट, हंबसाईड आणि वेस्ट मिडलँड्स यांचा समावेश आहे.
