बीजिंग: विमानात काही प्रवाशांमुळे गोंधळ होतो. काहीजण राडा ही करतात. मात्र, चीनमध्ये वेगळीच घटना समोर आली आहे. विमानामध्ये पायलट आणि फ्लाइट अटेंडेंटमध्ये जोरदार हाणामारी झाली. या हाणामारीत पायलटचा दात तुटला. या हाणामारीचा व्हिडिओ सोशल मीडियावर व्हायरल होत आहे. ही घटना समोर आल्यानंतर दोघांनाही निलंबित करण्यात आले असून उच्चस्तरीय चौकशी सुरू करण्यात आली आहे. चीनमधील माध्यमांनी दिलेल्या वृत्तानुसार ही घटना २० फेब्रुवारी रोजी झाली होती. नान्चाँगहून शियानसाठी विमानाने उड्डाण केले होते. विमान लँडिंग होण्याच्या ५० मिनिटांपूर्वी ही हाणामारी झाली. विमानातील प्रवाशांनी सांगितले की, मारहाण होण्याआधी पायलट आणि कर्मचाऱ्यामध्ये वाद झाला. वाद वाढल्यानंतर दोघांमध्ये हाणामारी सुरू झाली. एअरलाइन्सने या दोघांवर कारवाई केली आहे. मात्र, त्यांची नावे जाहीर केली नाहीत. या कारणांमुळे झाली हाणामारी विमान उड्डाणानंतर पायलटने विमानातील शौचालयाचा वापर करत होता. त्याच वेळेस विमानातील प्रथम श्रेणीतील केबिनमधील प्रवाशालादेखील शौचालयाचा वापर करायचा होता. पायलटने त्या प्रवाशाला काही वेळ प्रतिक्षा करण्यास सांगितले. मात्र,मप्रवाशाने पायलटच्या बोलण्याकडे दुर्लक्ष केले. पायलट शौचालयातून बाहेर आल्यानंतर तो प्रवासी शौचालया बाहेरच उभा होता. त्यानंतर पायलटने प्रथम श्रेणीच्या केबिनची जबाबदारी असलेल्या फ्लाइट अटेंडेंट बोलावले आणि त्याला सुनावले. योग्य प्रकारे काम करत नसल्यामुळे विमानाच्या सुरक्षितेला धोका निर्माण होई शकतो असा मुद्दाही पायलटने मांडला. फ्लाइट अटेंडेंटने आपली चूक फेटाळून लावत पायलटला विरोध केला. त्यानंतर दोघांमध्ये वाद झाला आणि हा वाद वाढून दोघांमध्ये हाणामारी झाली.
