मुंबई : करोना रुग्णांची वाढती संख्या आणि पुन्हा लॉकडाउनचे संकट गडद बनल्यानंतर कमॉडीटी बाजारात तेजी दिसून आली आहे. आर्थिक अनिश्चितता वाढू लागल्याने गुंतवणूकदारांनी पुन्हा एकदा सोने गुंतवणुकीला प्राधान्य दिले आहे. आज मंगळवारी कमॉडिटी बाजारात सोने १४२ रुपयांनी वाढले. मल्टी कमॉडिटी एक्सचेंजमध्ये सध्या सोन्याचा भाव प्रती १० ग्रॅम ४४३५० रुपये आहे. त्यात १३२ रुपयांची वाढ झाली आहे. तत्पूर्वी सोने ४४३८७ रुपयांपर्यंत वाढले होते. सोमवारी कमॉडिटी बाजार बंद होताना सोने दरात ४६८ रुपयांची घसरण झाली होती. सोने ४४२१५ रुपयांवर स्थिरावले होते. सध्या 'एमसीएक्स'वर एक किलो ६६०५५ रुपये असून त्यात २०३ रुपयांची वाढ झाली आहे. आज चांदीने ६६२७२ रुपयांपर्यंत वाढ नोंदवली होती. तर सोमवारी चांदी ६५८५६ रुपयांवर बंद झाली होती. त्यात २५३ रुपयांची वाढ झाली होती. good returns या वेबसाईटनुसार आज मंगळवारी मुंबईत २२ कॅरेट सोन्याचा भाव ४३६९० रुपये इतका खाली आला आहे. २४ कॅरेट सोन्याचा भाव ४४६९० रुपये झाला आहे. दिल्लीत २२ कॅरेट सोन्याचा भाव ४४१६० रुपये झाला आहे. २४ कॅरेटसाठी सोन्याचा भाव ४८१७० रुपये झाला आहे. चेन्नईत २२ कॅरेटसाठी ४२२२० रुपये असून २४ कॅरेटचा भाव ४६०६० रुपये आहे. कोलकात्यात २२ कॅरेट सोन्याचा भाव ४४१३० रुपये असून २४ कॅरेट सोन्याचा भाव ४६७७० रुपये आहे. अमेरिकेत बॉण्ड यिल्डमध्ये मोठी वाढ झाली आहे. त्याचा फायदा उचलत गुंतवणूकदारांनी अमेरिकन बॉण्ड मार्केटमध्ये खोऱ्याने पैसे गुंतवले आहेत. तसेच डॉलरचे मूल्य वधारले आहे. त्याचा परिणाम जागतिक कमॉडिटी बाजारात सोन्याच्या किमतीवर झाला आहे. जागतिक बाजारात आज सोन्याचा भाव ०.३० टक्क्यांनी वधारला असून तो १६८७.९० डॉलर प्रती औंस झाला. मात्र गेल्या ३० दिवसांत सोने दरात ७.०१ टक्क्यांनी घसरला आहे. जवळपास १२७.३० डॉलरने सोन्याचा भाव मागील महिनाभरात कमी झाला आहे. चांदीमध्ये देखील घसरण कायम आहे. प्रती औंस चांदीचा भाव २५.२७ डॉलर झाला आहे. करोना रोखण्यासाठी अनेक देशांनी कठोर लॉकडाउन जाहीर केले होते. त्यामुळे जगातिक अर्थव्यवस्था ठप्प झाली होती. यात आर्थिक अनिश्चित काळात सोन्याचा भाव वधारला होता. भांडवली बाजारातून पैसे काढून गुंतवणूकदारांनी सोन्यात गुंतवणूक केली होती. ऑगस्ट २०२० मध्ये जागतिक कमॉडिटी बाजारात सोने २०१० डॉलर प्रती औंस इतक्या विक्रमी पातळीवर गेला. तर देशांतर्गत कमॉडिटी बाजारात सोन्याचा भाव प्रती १० ग्रॅम ५६३१० रुपये इतका झाला होता
