मुंबई : जगभरात करोनाच्या दुसऱ्या लाटेने पुन्हा एकदा जोरदार तडाखे दिले आहेत. त्यात आखाती देशात निर्माण झालेल्या राजकीय अस्थिरतेने गुंतवणूकदारांमध्ये भीतीचे वातावरण आहे. जागतिक पातळीवरील नकारात्मक संकेतांनी धास्तावलेल्या गुंतवणूकदारांनी आज बाजारात चौफेर विक्री केली आहे. यामुळे सेन्सेक्स ४०० अंकांनी घसरला तर १३० अंकांची घसरण झाली आहे. सलग चार सत्रात तेजीने वधारलेल्या शेअर निर्देशांकात मंगळवारी मोठी घसरण झाली होती. मंगळवारी बाजार बंद होताना सेन्सेक्स ३४१ अंकांनी घसरला. तर निफ्टीत ९१ अंकांची घसरण झाली होती. करोनाच्या दुसऱ्या लाटेने भारतासह आशियातील इतर देशात थैमान घातले आहे. त्याचे पडसाद आशियातील प्रमुख भांडवली बाजारावर उमटले. आशियातील शेअर निर्देशांकाने एक महिन्याचा नीचांकी स्तर गाठला. सध्या मुंबई शेअर बाजाराचा सेन्सेक्स ४४८ अंकांनी कोसळला असून तो ४८७१३ अंकावर आहे. तर निफ्टी १३२ अंकांच्या घसरणीसह १४७१८ अंकावर आहे. बाजारात जवळपास १३६१ शेअरमध्ये वाढ झाली आहे. तर ११७० शेअर घसरले आहेत. आजच्या सत्रात बँका, वित्त संस्था, ऑटो, एफएमसीजी, आयटी आदी शेअरमध्ये घसरण झाली. ओएनजीसी, बजाज फायनान्स, मारुती, आयटीसी, बजाज ऑटो, टायटन, एचसीएल टेक, नेस्ले, ऍक्सिस बँक, एचयूएल, एचडीएफसी, आयसीआयसीआय बँक आदी शेअरमध्ये घसरण झाली आहे. दुसऱ्या बाजूला पॉवरग्रीड, एनटीपीसी, एसबीआय, एल अँड टी, डॉ. रेड्डीज लॅब, एशियन पेंट, सन फार्मा, बजाज फिनसर्व्ह या शेअरमध्ये वाढ झाली आहे. आज बीएसई ऑटो, बीएसई बँकेक्स, बीएसई आयटी या निर्देशांकात घसरण झाली आहे. देशात करोना संक्रमणाच्या दुसऱ्या टप्प्यात काही चांगले संकेतदेखील मिळत आहेत. अनेक राज्यांत आणि केंद्रशासित प्रदेशांत लॉकडाऊन आणि तत्सम निर्बंधांमुळे करोना संक्रमितांच्या संख्येत मोठा परिणामही दिसून येतोय. महाराष्ट्र, उत्तर प्रदेश, दिल्ली, राजस्थान, छत्तीसगड, बिहार, गुजरात, मध्य प्रदेश या राज्यांत करोना संक्रमितांची दररोजची संख्या घटताना दिसतेय.बुधवारी सकाळी आरोग्य मंत्रालयानं दिलेल्या माहितीनुसार, देशात मंगळवारी (११ मे २०२१) ३ लाख ४८ हजार ४२१ करोनाबाधित रुग्ण आढळले आहेत तर याच २४ तासांत तब्बल ३ लाख ५५ हजार ३३८ रुग्णांना रुग्णालयातून डिस्चार्ज देण्यात आला. एका दिवसात ४२०५ रुग्णांना आपले प्राण गमवावे लागले आहेत.
