रायपूरः छत्तीसगडमधील सूरजपूरचे जिल्हाधिकारी रणबीर शर्मा यांना तात्काळ पदावरून हटवण्यात ( ) आलं आहे. लॉकडाउन दरम्यान औषध घेण्यासाठी बाहेर पडलेल्या तरुणाला जिल्हाधिकारी रणबीर शर्मा यांनी कानशिलात लगावली. या घटनेचा व्हिडिओ सोशल मीडियावर व्हायरल झाला. यानंतर मुख्यमंत्री भूपेश बघेल यांनी कारवाई करत रणवीर शर्मा यांना जिल्हाधिकारीपदावरून तात्काळ हटवण्यात आले. त्यांच्या जागी आयएएस गौरव कुमार सिंह नवे जिल्हाधिकारी झाले आहे. सूरजपूर जिल्हाधिकारी रणबीर शर्मा यांनी एका तरुणासी गैरवर्तन केल्याचा प्रकार सोशल मीडियातून आपल्या निदर्शनास आला आहे. या घटनेची दखल आपण घेतली आहे. ही घटना खेदजनक आणि निषेधार्ह आहे. छत्तीसगडमध्ये अशा प्रकारचे कुठलंही कृत्य सहन केलं जाणार नाही. जिल्हाधिकारी रणबीर शर्मा यांना तात्काळ पदावरून हटवण्यात आलं आहे, असं ट्वीट मुख्यमंत्री बघेल यांनी केलं आहे. सरकारी पदावर असलेल्या कुठल्याही अधिकाऱ्याचे अशा प्रकारचे वर्तन स्वीकार्य नाही. या घटनेने मी स्तब्ध झालो आहे. तरुणाच्या कुटुंबीयांबद्दल खेद व्यक्त करतो, असं दुसऱ्या एका ट्वीटमध्ये बघेल यांनी सांगितलं. लॉकडाउन दरम्यान शनिवारी दुपारी एक तरुण प्रिस्क्रिप्शन घेऊन औषधं आणण्यासाठी मेडिकलवर निघाला होता. दुसरकडे जिल्हाधिकारी रणबीर शर्मा हे लॉकडाउनचा आढावा घेत होते. यावेळी रस्त्यावरील नागरिकांची वर्दळ पाहून ते संतापले. त्यांचं लक्ष तरुणवर गेलं. त्याला थांबवण्याची सूचना त्यांनी सुरक्षा कर्मचाऱ्यांना केली. हा तरुण थांबताच जिल्हाधिकारी रणबीर शर्मा यांनी त्याच्या कानशिलात लगावली. यावेळी तरुणाने जिल्हाधिकाऱ्यांना औषधाचं प्रिस्क्रिप्शन दाखवत होता. पण जिल्हाधिकाऱ्यांनी त्याचं काहीच ऐकलं नाही. मोबाइल हिसकावून त्यांनी तरुणाला रस्त्यावर पाडलं. या घटनेचा व्हिडिओ सोशल मीडियावर व्हायरल झाला. पण जिल्हाधिकाऱ्यांनी या घटनेबद्दल माफी मागितली. मात्र त्यांच्यावर कारवाई करत पदावरून हटवण्यात आलं.
