यवतमाळ: रुग्णावर उपचारासाठी प्रभावी ठरत असलेल्या रेमडेसिविर इंजेक्शनचा काळाबाजार केल्याप्रकरणी आणखी दोन परिचारिकांना अटक करण्यात आली आहे. त्यांच्याकडून रेमडेसिविरचे नऊ इंजेक्शन जप्त करण्यात आले आहेत. या प्रकरणाचे धागेदोरे थेट यवतमाळच्या शासकीय वैद्यकीय महाविद्यालयापर्यंत पोहोचल्यानं खळबळ उडाली आहे. ( In ) वाचा: रेमडेसिविरचा काळाबाजार होत असल्याचं समजताच पोलिसांनी शनिवारी डॉ. अक्षय मोहन तुंडलवार (३४), रा. कळंब, सावंत अरुण पवार (४०), रा. कळंब, सौरभ सुधाकर मोगरकर (२७), रा. कळंब, बिलकीस बानो मोहम्मद इकबाल अन्सारी (७५), रा. यवतमाळ, यांना अटक केली होती. तर, शनिवारी रात्री इथे कारवाई करून शबनम शेख (२५, रा. नागपूर) या परिचारिकेला अटक करण्यात आली. या सर्व आरोपींना न्यायालयात हजर केले गेले. परिचारिका शबनम शेख ही पाच महिन्यांची गर्भवती असल्याने तिला व तिची आई बिलकीस बानो मोहम्म्द इकबाल हिला न्यायालयानं जामीन मंजूर केला. उर्वरित आरोपींना एक दिवसाची पोलीस कोठडी सुनावली. वाचा: याच प्रकरणात रविवारी दुपारी यवतमाळच्या शासकीय वैद्यकीय महाविद्यालयातील परिचारिका पूनम मेश्राम (२७, रा. यवतमाळ) हिला अटक करण्यात आली. त्यानंतर तिला वैद्यकीय तपासणीसाठी नेण्यात आलं. आज तिलाही न्यायालयात हजर केलं जाणार आहे. या घटनेनं वैद्यकीय क्षेत्र ढवळून निघालं आहे. या काळाबाजार प्रकरणाचे धागेदोरे यवतमाळच्या शासकीय वैद्यकीय महाविद्यालयापर्यंत पोहोचल्याचं तपासात पुढं आल्यानं खळबळ उडाली आहे. या प्रकरणाचा अधिक तपास सुरू असून हे मोठं रॅकेट असल्याची शक्यता पोलिसांनी व्यक्त केली आहे. या आरोपींनी केवळ औषधांचा काळाबाजार केला की गुजरातमधील बनावट इंजेक्शनची विक्रीही केली, हे तपासण्याचं आव्हान आता पोलिसांपुढं आहे. वाचा:
