मुंबई- बॉलिवूड कलाकारांना जेव्हा चित्रपटांमधून लोकप्रियता मिळते तेव्हा त्यांना निरनिराळ्या कार्यक्रमांना उपस्थित राहण्याच्या ऑफर येऊ लागतात. दहीहंडी उत्सवांना किंवा वाढदिवसाच्या कार्यक्रमांना उपस्थित राहणारे कलाकार आपण पाहतो. एखाद्या दुकानाचं उद्घाटन असेल तरीदेखील फित कापण्यासाठी कलाकाराला बोलावलं जातं. परंतु, बॉलिवूड अभिनेता याला आलेली एक ऑफर सगळ्यात हटके होती आणि या ऑफरसाठी त्याला चक्क ५ लाख रुपये मिळणार होते. चंकीने दिलेल्या एका मुलाखतीत त्याला आलेल्या या जगावेगळ्या ऑफरबद्दल सांगितलं होतं. चंकीने म्हटलं, 'एका व्यावसायिकाच्या मृत्यूवर शोक व्यक्त करण्यासाठी मला ऑफर देण्यात आली होती. मला फक्त तिथे जाऊन दुःख व्यक्त करायचं होतं. मी तिथे गेल्याने त्या कुटुंबाची समाजातील प्रतिष्ठा आणखीनच वाढणार होती. सोबत त्यांना सगळ्यांना पटवून द्यायचं होतं की त्या मृत व्यक्तीने चित्रपटांसाठी पैसे लावले आहेत तर ते आता काही जणांचे पैसे परत करू शकणार नाही. इतरांचे पैसे न देण्यासाठी माझा वापर केला जाणार होता. मला फक्त तिथे जाऊन एका कोपऱ्यात उभं राहायचं होतं. मला ते पटलं नाही आणि मी माझ्या जागी दुसऱ्या कुणाला तरी पाठवलं.' चंकी पुढे म्हणाला, 'मी कोणाला पाठवलं हे सांगू नाही शकत. मी दुसऱ्याला पाठवलं म्हणून माझं नुकसान झालं अशातला भाग नाही पण नुसतं एका कोपऱ्यात उभं राहण्यासाठी ५ लाख रुपये ही रक्कम फार मोठी होती.' चंकीने १९८७ च्या 'आग ही आग' या चित्रपटातून बॉलिवूडमध्ये पदार्पण केलं होतं. त्यानंतर चंकीने अनेक हिट चित्रपटात काम केलं. परंतु, लोकप्रियतेच्या शिखरावर असतानाच चंकीने चित्रपटात काम करणं बंद केलं. त्यानंतर आपल्या पत्नीच्या सांगण्यावरून चंकीने पुन्हा चित्रपटांमध्ये काम करण्यास सुरुवात केली.
