मुंबई : जागतिक कमॉडिटी बाजारात कच्च्या तेलाच्या किमतीत वाढ झाली आहे. ब्रेंट क्रूडचा भाव ७४ डॉलरच्या पुढे गेला आहे. यामुळे पेट्रोलियम कंपन्यांवरील दबाव वाढला आहे. मात्र तरीही देशभरात सलग १० व्या दिवशी पेट्रोल आणि डिझेल दर स्थिर आहेत. आज कंपन्यांनी इंधन दरात कोणताही बदल केलेला नाही. आज सलग दहाव्या दिवशी पेट्रोल आणि डिझेलचा भाव 'जैसे थे'च आहे. मुंबईत आजचा एक लीटर पेट्रोलचा भाव १०७.८३ रुपये आहे. दिल्लीत पेट्रोल १०१.८४ रुपये आहे. चेन्नईत पेट्रोलचा भाव १०२.४९ रुपये इतका आहे. तर कोलकात्यात एक लीटर पेट्रोल १०२.०८ रुपये झाले आहे. भोपाळमध्ये साध्या पेट्रोलचा भाव ११०.२० रुपयांवर कायम आहे. बंगळुरात पेट्रोल १०५.२५ रुपये झाले आहे. मुंबईत आजचा डिझेलचा भाव ९७.४५ रुपयांवर कायम आहे. दिल्लीत डिझेल ८९.८७ रुपये आहे. चेन्नईत ९३.६३ रुपये आणि कोलकात्यात डिझेलचा भाव ९३.०२ रुपये प्रती लीटर झाला आहे. भोपाळमध्ये डिझेलचा भाव ९८.६७ रुपये झाला आहे. बंगळुरात डिझेल ९५.२६ रुपये आहे. कच्च्या तेलाच्या भाव सोमवारी ०.४० डॉलरने वधारला आणि तो प्रती बॅरल ७४.५० डॉलर झाला. त्याशिवाय डब्ल्यूटीआय क्रूडचा भाव ७२.११ डॉलरवर स्थिरावला. मागील काही महिन्यांमध्ये कच्च्या तेलाच्या किमतीत वाद झाली आहे. जानेवारीपासून तेलाच्या किमतीत सरासरी ४५ टक्के वाढ झाली आहे. देशात करोना रुग्ण संख्या कमी होत असल्याने सरकारला दिलासा मिळाला असला तरी दुसऱ्या बाजूला क्रूडच्या वाढत्या किमतींनी सरकारची चिंता वाढवली आहे.
