इस्लामाबाद: पाकिस्तानमध्ये पुन्हा एकदा चिनी नागरिकांना लक्ष्य करण्यात आले आहे. दहशतवाद्यांनी शुक्रवारी रात्री दक्षिण पश्चिम पाकिस्तानमधील ग्वादरमध्ये केला. या हल्ल्यात दोन मुले ठार झाली. तर, तीनजण जखमी झाली आहेत. या हल्ल्याची कोणत्याही संघटनेने जबाबदारी घेतली नाही. बलुचिस्तान सरकारचे प्रवक्ते लियाकत शाहवानी यांनी सांगितले की, या हल्ल्यात दोन मुलांचा मृत्यू झाला आहे. तर, तीनजण जखमी झाले आहेत. ग्वादर बंदर असलेल्या शहराच्या ईस्ट बे मार्गावर रात्री सात वाजण्याच्या सुमारास हा आत्मघाती हल्ला झाला. या हल्ल्यात चिनी नागरिक किरकोळ जखमी झाले आहेत. ग्वादर बंदर हे बलुचिस्तानच्या दक्षिण-पश्चिम प्रांतात आहे. मागील काही काळापासून बलुच बंडखोरांकडून सातत्याने हल्ले सुरू आहेत. चीन-पाकिस्तानच्या 'सीपीईसी' प्रकल्पाला विरोध चायना-पाकिस्तान इकॉनॉमिक कॉरिडोरला बलुचिस्तानमधील बंडखोरांनी मोठा विरोध केला आहे. बलुचिस्तान लिबरेशन आर्मीच्या सशस्त्र बंडखोरांनी चिनी नागरिकांवर हल्ले केले असल्याचाही आरोप करण्यात येतो. सन २०१८ मध्ये या संघटनेने कराचीमधील चीनच्या वाणिज्य दूतावासावर हल्ला केला असल्याचा आरोप लावण्यात आला. बलुचिस्तानमधील नैसर्गिक साधनसंपत्तीची लूट करण्याचा आणि येथील नागरिकांच्या जमिनी बळकावण्यासाठी हा प्रकल्प असल्याचा आरोप बलुच बंडखोरांनी याआधी केला आहे. याआधी काही दिवसांपूर्वीच एका जलविद्युत प्रकल्पाच्या ठिकाणी जाणाऱ्या चिनी अभियंते आणि कर्मचाऱ्यांची बस स्फोटकांनी उडवण्यात आली होती. यामध्ये चिनी अभियंत्यांसह दोन पाकिस्तानी जवान ठार झाले होते. त्यानंतर चीनने पाकिस्तानवर नाराजी व्यक्त केली होती. चीनने या हल्ल्याची चौकशी स्वत: करण्याचाही निर्णय घेतला होता.
