वॉशिंग्टन: अमेरिकेतील श्वेतवर्णीयांची टक्केवारी प्रथमच घटल्याचे ताज्या जनगणनेतून स्पष्ट झाले आहे. गेल्या दशकाच्या (२०११-२०२०) जनगणनेतील काही सांख्यिकी भाग सेन्सस ब्युरोने गुरुवारी प्रसिद्ध केला. अमेरिकेची समाजरचना अधिक वैविध्यपूर्ण झाली असून श्वेतवर्णीयांची संख्या कमी झाल्याचे यानिमित्त प्रथमच नोंदीवर आले आहे. अमेरिकी निवडणुकांतील राजकीय समीकरणेही या जनगणनेनंतर बदलणार आहेत. अमेरिकेत २०१०नंतर झालेले बदल या जनगणनेमध्ये नोंदविण्यात आले आहेत. यानुसार २०१०च्या जनगणनेत ६३.७ टक्के असणारे श्वेतवर्णीयांचे प्रमाण आता ५७.८ टक्क्यांपर्यंत घटले आहे. हिस्पेनिक (मूळचे स्पेन अथवा पोर्तुगालचे) व आशियाईंच्या तुलनेत श्वेतवर्णीयांचा जन्मदर कमी झाल्याने श्वेतवर्णीयांचे लोकसंख्येतील प्रमाण प्रथमच खालावल्याचे दिसून आले. या जनगणनेनुसार अमेरिकेत सद्यस्थितीत १९.१ कोटी श्वेतवर्णीय आहेत. गेल्या जनगणनेच्या वेळी त्यांची संख्या १.९६ कोटी होती. कॅलिफोर्निया हे अमेरिकेतील सर्वाधिक लोकसंख्येचे राज्य असून तेथेही श्वेतवर्णीयांची संख्या घटली आहे. २०१०च्या जनगणनेत कॅलिफोर्नियाच्या लोकसंख्येत ४०.१ टक्के असणारे श्वेतवर्णीय ताज्या जनगणनेत ३४.७ टक्के नोंदवले गेले आहेत. दुसरीकडे तेथील हिस्पेनिक नागरिकांची टक्केवारी ३७.६ टक्क्यांवरून ३९.४ टक्क्यांवर पोहोचली आहे. यामुळे कॅलिफोर्नियाच्या लोकसंख्येत आत्तापर्यंत सर्वाधिक प्रमाण राखणारे श्वेतवर्णीय आता दुसऱ्या क्रमांकावर गेले आहेत. हवाई, न्यू मेक्सिको आणि कोलंबिया येथेही हीच स्थिती निर्माण झाली आहे. आता कधी नव्हे एवढी वैविध्यपूर्ण व बहुवर्णीय झाली आहे, असे मत सेन्सस ब्युरोचे अधिकारी निकोलस जोन्स यांनी व्यक्त केले. अमेरिकेत श्वेतवर्णीय, कृष्णवर्णीय, अमेरिकी भारतीय, हवाईचे मूळ नागरिक अथवा पॅसिफिक नागरिक असे प्रमुख समूह आहेत. परंतु या पलीकडे असणाऱ्या मिश्रवंशीय नागरिकांची संख्याही वाढल्याचे या जनगणनेत दिसून आले. विशेष म्हणजे या मिश्रवंशीयांची संख्या येथील कृष्णवर्णीयांपेक्षा अधिक ठरली आहे. अमेरिकेत ४.६० कोटी कृष्णवर्णीय असून मिश्रवंशीयांची संख्या ४.९९ कोटी नोंदवली गेली आहे. अमेरिकेतील आशियाई नागरिकांची संख्या वाढून २.४ कोटींवर पोहोचली आहे. ग्रामीण भाग व लहान शहरांतील नागरिक महानगरांमध्ये मोठ्या प्रमाणावर स्थलांतरित झाल्याने महानगरांमध्ये लोकसंख्येची घनता सर्वाधिक नोंदवली गेली आहे.
