काबूल: तालिबानने अफगाणिस्तानवर ताबा मिळवल्यानंतर अनेक अफगाण नागरिकांनी देश सोडण्यासाठी धडपड सुरू केली. राजधानी काबूलमधील हामिद करझाई विमानतळावर विदारक दृष्ये दिसून आले. अनेकांनी विमानात प्रवेश करण्यासाठी जीवही धोक्यात घातला. तर, काहींनी विमानाला लटकण्याचा प्रयत्न केला. अफगाण नागरिकांवर ओढावलेल्या भयाण संकटाचे वृत्त समोर येत असताना दुसरीकडे काही फोटो सोशल मीडियावर व्हायरल झाले आहेत. अफगाण नागरिकांची भयावह परिस्थिती अमेरिकेच्या एका विमानातही दिसून आल्याचे सांगितले गेले. या विमानात १३४ प्रवाशांची क्षमता होती. मात्र, त्यामध्ये ८०० जणांना प्रवेश देण्यात आल्याचा दावा करत अमेरिकेच्या 'डिफेन्स वन' या संरक्षणविषयक वृत्तसंकेतस्थळाने एक फोटो पोस्ट केला. हा व्हायरल झाला. मात्र, हा फोटो जुना असल्याचे समोर आले आहे. 'डिफेन्स वन'ने आपल्या वृत्तात काय म्हटले होते? 'डिफेन्स वन'ने आपल्या वृत्तात ६४० अफगाण नागरिकांना अमेरिकन सैन्याने विमानात प्रवेश देत त्यांना अफगाणिस्तानबाहेर काढले असल्याचे सांगितले. हा फोटो थेट विमानातील असल्याचा दावा त्यांनी केला. वाचा: अमेरिकेच्या 'डिफेन्स वन' वृत्तसंकेतस्थळाच्या हवाल्याने आंतरराष्ट्रीय वृत्तसंस्थांनीदेखील हाच फोटो वापरत वृत्त दिले. मात्र, त्यांच्या एका फोटोमुळे मोठा गोंधळ उडाला असल्याचे समोर आले आहे.
