काबूल: काबूल विमानतळावर गुरुवारी संध्याकाळी आत्मघाती हल्ला झाला होता. या हल्ल्यात अमेरिकेचे १३ जवान ठार झाले होते. या हल्ल्यानंतर अमेरिकेने प्रत्युत्तरात कारवाई केली आहे. अमेरिकेने आयएसआयएस-केच्या ठिकाणांवर एअर स्ट्राइक केला आहे. या एअर स्ट्राइकमध्ये हल्ल्याचा सूत्रधारही ठार झाल्याचे वृत्त आहे. अमेरिकेचे राष्ट्राध्यक्ष जो बायडन यांनी दहशतवाद्यांना याची किंमत चुकवावी लागणार असल्याचे म्हटले होते. अमेरिकेतील माध्यमांनी दिलेल्या वृत्तानुसार, अफगाणिस्तानमधील नांगहार प्रांतातील आयएसआयएस-के या दहशतवादी संघटनेच्या ठिकाणावर हल्ला करण्यात आला. या एअर स्ट्राइकमध्ये दहशतवादी हल्ल्याचा सूत्रधार ठार झाल्याचा दावा करण्यात आला आहे. नांगहार हा इस्लामिक स्टेटचा बालेकिल्ला समजला जातो. अमेरिकेच्या प्रत्युत्तराच्या कारवाईत सामान्य नागरिक ठार झाला नसल्याचे वृत्त आहे. अमेरिकेचे संरक्षण मंत्रालय पेंटागॉनने या एअर स्ट्राइकच्या वृत्ताला दुजोरा दिला आहे. सेंट्रल कमांडचे कॅप्टन बिल अर्बन यांनी सांगितले की, अफगाणिस्तानच्या नांगहार प्रांतात एक एअर स्ट्राइक करण्यात आला. मिळालेल्या प्राथमिक माहितीनुसार हा एअर स्ट्राइक यशस्वी झाला आहे. अमेरिकन दूतावासाचा इशारा काबूल विमानतळावर पुन्हा एकदा दहशतवादी हल्ला होण्याची शक्यता वर्तवण्यात येत आहे. अमेरिकेच्या गुप्तचर संस्थेच्या अहवालात हा इशारा देण्यात आला आहे. अमेरिकन दूतावासाने विमानतळाच्या प्रवेशद्वारापासून दूर राहण्याचा सल्ला नागरिकांना दिला आहे. त्याशिवाय विमानतळाकडे जात असलेल्या अमेरिकन नागरिकांसाठी विशेष मार्गदर्शक सूचनाही देण्यात आल्या आहेत.
