काबूल: सैन्यावर वरचढ ठरत असलेल्या तालिबानने इराणचे एक लष्करी ड्रोन पाडले असल्याचा दावा केला आहे. तालिबानींसोबत एक अपघातग्रस्त ड्रोन असलेला फोटो व्हायरल होत आहे. काही फोटोंमध्ये एका वाहनातून तालिबानी ड्रोनला दुसऱ्या ठिकाणी नेत असल्याचे दिसून आले. हा ड्रोन पश्चिम प्रांतातील फराह प्रांतात पाडण्यात आला. अफगाणिस्तानच्या हवाई हद्दीत हा ड्रोन टेहळणी करत होता. प्रवक्ता जबीउल्लाह मुजाहिदने म्हटले की, तालिबानी कॅडरने इराणच्या सीमाभागातून एक ड्रोन जप्त केला आहे. या ड्रोनची तपासणी करण्यात येत आहे. हा ड्रोन अफगाणिस्तानच्या हवाई हद्दीत कसा शिरला याचीही चौकशी करण्यात येत आहे. इराणच्या या ड्रोनचे नाव मोहजर -२एन (Mohajer-2N) असल्याचे सांगितले जाते. काही दिवसांपूर्वीच ही घटना घडली असल्याचे म्हटले जात आहे. इराणची सीमा अफगाणिस्तानला लागून आहे. त्यामुळे अफगाणिस्तानमधील चिघळलेली परिस्थिती पाहता इराणने सीमा भागातील सुरक्षा व्यवस्थेत वाढ केली आहे. दरम्यान, अफगाणिस्तानमध्ये तालिबानच्या वाढत्या वर्चस्वामुळे अफगाण सरकारसह अमेरिकादेखील चिंतेत आहे. कतारची राजधानी दोहा येथे सुरू असलेल्या चर्चेत अमेरिकेच्या अधिकाऱ्यांनी तालिबानला विनंती केली आहे. धास्तावलेल्या अमेरिकन अधिकाऱ्यांनी तालिबानकडे अमेरिकेच्या दूतावासाच्या संरक्षणाचे आश्वासन मागितले आहे. तालिबानने मागील काही दिवसात महत्त्वाच्या शहरांवर ताबा मिळवला आहे. हेरात, गझनी, कंदहार या महत्त्वाच्या शहरांवरही तालिबानने आपला झेंडा फडकवला आहे. त्यामुळे येत्या काही दिवसांत तालिबान काबूलवर हल्ला करण्याची शक्यता आहे. त्यावेळी अमेरिकन दूतावासावर अथवा कर्मचाऱ्यांवर हल्ला करू नये यासाठी अमेरिकेने तालिबानला गळ घालण्यास सुरुवात केली आहे.
