मुलाची जिवंतपणी तिरडी बांधणाऱ्या पित्यास अटक म. टा. खास प्रतिनिधी, मुंबई: भांडण करून घर सोडून माहेरी गेलेली पत्नी पुन्हा घरी यावी, यासाठी लहान मुलांच्या जिवाशी खेळ करणाऱ्या पतीला कुरार पोलिसांनी अटक केली. या पित्याने मुलाला जमिनीवर झोपवून त्याच्या अंत्यसंस्काराची तयारी सुरू असल्याचे भासवणारा फोटो पत्नीला पाठवला. इतकेच नाही, तर मुलीला गळ्याला फास लावण्याचे नाटक करण्यास भाग पाडले. हा प्रकार वेळीच शेजाऱ्यांच्या लक्षात आल्याने मोठा अनर्थ टळला. पित्याच्या हा कृतीबद्दल प्रचंड संताप व्यक्त होत आहे. कुरारमध्ये वास्तव्यास असलेल्या सूचित गौड याला दारूचे व्यसन असून दारूच्या नशेमध्ये तो पत्नी आणि मुलांना वारंवार मारहाण करत असे. व्यसनाधीन पतीच्या रोजच्या त्रासाला कंटाळून त्याची पत्नी १३ वर्षांची मुलगी आणि आठ वर्षाचा मुलगा या दोघांना घेऊन गावी गेली. काही दिवसानंतर सूचित गावाला जाऊन दोन्ही मुलांना घेऊन मुंबईत आला. मुलांना आणल्यामुळे पत्नीदेखील आपोआप येईल, असे त्याला वाटले. मात्र पत्नी येण्यास राजी नव्हती. अखेर सूचित याने आठ वर्षाच्या मुलाला त्याने घरात जमिनीवर झोपवून अंत्यविधी होत असल्याचे भासवण्यासाठी त्याच्यावर सफेद कापड, हार घातले आणि तो फोटो व्हॉटसॲपवरून पत्नीला पाठवला. तरीही ती येत नसल्याने त्याने आणखी एक शक्कल लढवायचे ठरवले. सूचित याने पंख्याला ओढणी बांधून त्याखाली टेबलावर मुलीला उभे केले आणि गळ्यात फास लटविण्यास भाग पाडू लागला. मात्र मुलीने घाबरून आरडाओरडा सुरू केला. 'फास गळ्यात टाकला नाही, तर पंखा चालू करेन' अशी धमकी सूचित तिला देऊ लागला. मात्र तेवढ्यात आरडाओरडा ऐकून शेजाऱ्यांनी धाव घेत मुलीची सुटका केली. याबाबत माहिती मिळताच कुरार पोलिस घटनास्थळी पोहचले आणि पळण्याच्या तयारीत असलेल्या सूचित याला अटक केली.
