म. टा. प्रतिनिधी, मुंबईः राज्याची जीवनवाहिनी असलेली एसटी आता गरीब अभ्यासू विद्यार्थिनीची शिक्षणवाहिनी बनणार आहे. वेंगुर्ले गावातील वृणाली माडये हिने गावात इंटरनेटची रेंज मिळत नसल्याने एसटी स्थानकावर अभ्यास करून दहावीच्या परीक्षेत ९९.६० टक्के गुण मिळवले. महाराष्ट्र टाइम्सच्या 'मटा हेल्पलाइन' उपक्रमांतर्गत वृणालीचे वृत्त प्रसिद्ध होताच, राज्य परिवहन महामंडळाने याची तातडीने दखल घेतली. येथील विद्यार्थ्यांचा शिक्षणप्रवास सुखरूप होण्यासाठी लाल परीच या विद्यार्थिनीच्या मदतीला धावून आली आहे. तिच्या गावात एसटी सेवा सुरू करण्याचा निर्णय महामंडळाने घेतला आहे. केवळ पैशांअभावी शिक्षण थांबू नये, यासाठी गुणवंताना आर्थिक पाठबळ देण्यासाठी 'मटा हेल्पलाइन' उपक्रम राबविण्यात येत आहे. या उपक्रमातंर्गत 'एसटी थांबा बनला अभ्यासवर्ग' या मथळ्याखाली वृणाली माडये या दहावीच्या विद्यार्थीनीचा संघर्ष बुधवारी प्रसिद्ध करण्यात आला. याची तत्काळ दखल राज्य परिवहन महामंडळाचे उपाध्यक्ष आणि व्यवस्थापकीय संचालक शेखर चन्ने यांनी घेतली. वेंगुर्ले आगारप्रमुखांनी वृणाली माडये हिच्या वाइन परुळे (ता. वेंगुर्ले) येथील घरी जाऊन पुष्पगुच्छ देऊन तिचे अभिनंदन केले. त्या वेळी तिने पुढील शिक्षणासाठी पाट (ता. कुडाळ) येथील महाविद्यालयात अकरावी विज्ञान शाखेत प्रवेश घेतल्याचे सांगितले. त्यानंतर अभियांत्रिकी शिक्षण घेऊन स्पर्धा परीक्षा देण्याचा मनोदयही तिने व्यक्त केला. सद्य:स्थितीत महाविद्यालय सुरू नाही. महाविद्यालय सुरू झाल्यावर वेंगुर्ला आगाराची भोगवे वस्तीची बस सुरू करावी, अशी विनंती तिने केली. त्यानुसार सेवा सुरू करण्यात येणार आहे, असे एसटी महामंडळाकडून सांगण्यात आले. वृणाली व तिच्यासारख्या असंख्य मुलींच्या शिक्षणात खंड पडणार नाही, याची विशेष दक्षता घ्यावी, अशा सूचना शेखर चन्ने यांनी एसटीच्या स्थानिक प्रशासनाला केल्या आहेत. महाविद्यालय सुरू होताच, शालेय फेऱ्या सुरू करण्याबरोबरच बारावीपर्यंत शिक्षण घेणाऱ्या विद्यार्थिनींना एसटी महामंडळातर्फे दिला जाणारा अहिल्याबाई होळकर मोफत प्रवास पास देखील विनाविलंब उपलब्ध करावा, असे आदेशही चन्ने यांनी या वेळी दिले.
