नवी दिल्ली : चेन्नई सुपरकिंग्ज संघाचा कर्णधार महेंद्रसिंह धोनीने आयपीएल २०२१च्या दुसऱ्या टप्प्याची घोषणा हटक्या अंदाजात केली आहे. बॉलिवूड चित्रपटातील प्रसिद्ध डायलॉगच्या टॅगवर आयपीएलच्या प्रमोशनचा व्हिडिओ सध्या सोशल मीडियात धुमाकूळ घालत आहे. या व्हिडिओत धोनी केबल सिताराच्या भूमिकेत दिसून येतो. आयपीएलमध्ये आता वादळ येणार आहे, असं तो व्हिडिओतून सांगत आहे. या व्हिडिओत धोनी कलरफूल कपड्यात दिसून येत आहे. केसांना कलर केला असून रॉकस्टारसारखा तो दिसत आहे. व्हिडिओमधील धोनीचा केबल सितारा प्रेक्षकांच्या पसंतीस पडत आहे. “मेहरबान-साहेबान, विवो आयपीएल के कदरदान, बच्चा पहलवान. इंटरवल के बाद आएगा दूसरे हाफ का तूफान. डार्लिंग... ड्रामा है, सस्पेंस है, क्लाइमैक्स है. गब्बर है छोटे, हिटमॅन है, हेलिकॉप्टर का टेकऑफ है. किंग है, प्लेऑफ है, सुपरओव्हर है. पहला हाफ तो सिर्फ झांकी है, विवो आयपीएल के दूसरे हाफ का असली पिक्चर अभी बाकी है,” असं धोनी व्हिडिओत बोलताना दिसत आहे. अनेक चाहत्यांना धोनीला पुन्हा एकदा जाहीरातीद्वारे छोट्या पडद्यावर पाहिल्याचा आनंद झाला आहे. तर काहीजणांनी या आधीच्या आयपीएल थीमच्या तुलनेत ही थीम असंतुष्ट असल्याचे सांगितले आहे. इंडियन प्रिमिअर लीगने आयपीएल २०२१ चा व्हिडिओ शेअर करताना म्हटलं आहे की, 'विवो आयपीएल २०२१ परत आलं आहे. आणि आता पुन्हा एकदा ते हिट होण्यासाठी तयार आहे. या ब्लॉकबस्टर सीजनचा शेवट कसा होणार हे शोधावं लागेल, कारण असली पिक्चर अभी बाकी है!' दरम्यान, धोनीचा चेन्नई सुपरकिंग्स आणि मुंबई इंडियन्स हे दोन्ही संघ युएईत दाखल झाले आहेत. युएईतील मैदानांवर चेन्नईच्या संघाने सराव सुरू केला आहे. आयपीएल २०२१ स्पर्धा ९ एप्रिलपासून सुरू झाली होती. पण देशात कोरोनाच्या दुसऱ्या लाटेने थैमान घातल्याने ती स्थगित करण्यात आली होती. आता दुसऱ्या टप्प्यात आयपीएलचे उर्वरीत ३१ सामने खेळविले जाणार आहेत.
