- करोना निर्बंध पाळून विसर्जनाचे नियोजन - बहुतांश बाप्पांचे विसर्जन संध्याकाळी ४ नंतर - अनेक मंडळांचा मंडपातच विसर्जनाचा निर्णय म. टा. विशेष प्रतिनिधी, मुंबई करोना प्रतिबंधक निर्बंधांच्या चौकटीत आपल्या लाडक्या बाप्पाला निरोप देण्यासाठी मंडळांनी विविध शक्कल लढवल्या आहेत. वाजतगाजत बाप्पाला निरोप देता येणार नसला तरी पालखीपासून ते सजवलेल्या ट्रक, बसपर्यंत अनेक वाहने गणरायाच्या निरोपासाठी मंडळांकडून सज्ज ठेवण्यात आली आहेत. उपनगरातील अनेक मंडळांनी मंडपातच कृत्रिम तलावामध्ये विसर्जनाचा निर्णय घेतला आहे. लालबाग, खेतवाडीसह दक्षिण मुंबईतील अनेक मोठ्या मंडळांच्या गणरायाचे विसर्जन हे संध्याकाळी गिरगाव चौपाटीवर होणार आहे. गणेश विसर्जनासाठी प्रत्येक मंडळाच्या केवळ दहा कार्यकर्त्यांना परवानगी देण्यात आली आहे. त्यानुसार प्रत्येक मंडळाने नियोजन केले आहे. लाखो भाविकांचे लक्ष लागलेला 'लालबागचा राजा' विसर्जनासाठी सजवलेल्या खुल्या ट्रकवरून जाणार आहे. तर, भेटी लागी जीवा या संकल्पनेवर आधारित उत्सव साजरा करणाऱ्या चिंचपोकळी सार्वजनिक उत्सव मंडळाचे गणराज सजवलेल्या बसमधून निरोप घेणार आहेत. यंदा अमृत महोत्सवी वर्ष असलेल्या नरे पार्कने मात्र विभागातच कृत्रिम तलावात बाप्पाचे विसर्जन करण्याचा निर्णय घेतला आहे. गिरगावचा राजा म्हणून प्रसिद्ध असलेल्या निकदवारी लेन सार्वजनिक गणेशोत्सव मंडळानेही सरकारने दिलेल्या सूचनांचे पालन करीत विभागातच गणेश विसर्जनाचा निर्णय घेतला आहे. खेतवाडीतील बहुतांश मंडळांच्या बाप्पांचे विसर्जन संध्याकाळी चारनंतर गिरगाव चौपाटीवर होणार आहे. करोनाच्या तिसऱ्या लाटेची शक्यता लक्षात घेऊन यंदा गणेशभक्तांना मंडपामध्ये थेट प्रवेश नाकारण्यात आला होता. त्यामुळे आता निरोप घेण्याआधी आपल्या बाप्पाचे दर्शन विभागातील रहिवाशांना घेता यावे यादृष्टीने बहुतांश मंडळांनी पोलिसांसोबत समन्वय साधत आखणी केली आहे. त्यानुसार खुल्या ट्रकवरून विभागातूनच वेगवेगळ्या मार्गांवरून फिरत अनेक मंडळे विसर्जनस्थळी पोहोचणार आहेत. शामनगरचा राजा, बाळ गोपाळ मित्र मंडळ अशा अनेक मंडळांचे बाप्पा पालखीत विराजमान होणार आहेत. पूर्व व पश्चिम उपनगरातील बहुतांश मंडळांनी पालिकेच्या सहकार्याने जवळच्या कृत्रिम तलावावर विसर्जन करण्यासाठीच्या वेळा नक्की केल्या आहेत. त्यामुळे गर्दीवर अंकुश ठेवणे प्रशासनाला शक्य होणार आहे. अंधेरी येथील सहारचा मानकरी गणराज, एकदंत मित्र मंडळ यांनी विसर्जनही पर्यावरणपूरक पद्धतीने करण्याचा निर्णय घेतला आहे. यंदाही पुष्पवृष्टी नाही गणरायाच्या विसर्जन मिरवणुकीदरम्यान लालबाग श्रॉफ बिल्डिंगसह अनेक ठिकाणी मानाच्या गणपतींवर पुष्पवृष्टी केली जाते. यंदा पोलिसांनी दिलेल्या सूचनांचे पालन करत मंडळांनी ही पुष्पवृष्टी किंवा मंडळांच्या गणपतीच्या स्वागताचे नियोजन न करण्याचा निर्णय घेतला आहे. करोनाचे निर्बंध पाळत प्रशासनाला सहकार्य करीत यंदाचा विसर्जन सोहळा पार पाडण्यावरच आमचा भर असेल, असे बहुतांश मंडळांकडून सांगण्यात येत आहे.
