म. टा. विशेष क्रीडा प्रतिनिधी,मुंबई/ म. टा. वृत्तसेवा, कल्याण करोनामुळे अनेक व्यवहार सुरू झाले तरी राज्यातील तरणतलाव स्पर्धकांसाठीही खुले झालेले नाहीत. त्याचा फटका जलतरणपटूंना बसत आहे. राष्ट्रीय तसेच आंतरराष्ट्रीय स्पर्धा सहभागाचे दरवाजे त्यांच्यासाठी पूर्ण बंद होऊ नयेत, हा विचार करून या खेळाडूंना गुजरातचा पर्याय देण्यात आला आहे. राष्ट्रीय स्पर्धेच्या निवड चाचणीसाठी राज्यातील तरणतलाव खुले होत नाहीत हे पाहिल्यानंतर राज्य संघटनेने गुजरातची मदत घेतली आहे. राष्ट्रीय स्पर्धेसाठी निवडचाचणी अहमदाबादला खासगी तरणतलावावर घेण्याचे ठरले आहे. राज्यात चाचणी होणार नाही, हे पाहून महाराष्ट्र राज्य जलतरण संघटनेच्या पदाधिकाऱ्यांनी शेजारच्या राज्यांशी संपर्क साधला. केवळ गुजरातच नव्हे तर कर्नाटकनेही चाचणीसाठी तयारी दाखवली. मात्र, सर्व विचार करून गुजरातला पसंती देण्यात आली. कर्नाटकात राष्ट्रीय जलतरण स्पर्धा ऑक्टोबरमध्ये होईल. या स्पर्धेतून जागतिक क्रीडा स्पर्धा, खेलो इंडिया, राष्ट्रकुल, आशियाई क्रीडा स्पर्धा तसेच राष्ट्रीय शिबिरासाठी संघ निवडण्यात येईल. चाचणीतच सहभागी झाले नाही तर हे पुढील दरवाजे उघडणार कसे, हा विचार करूनच राज्याबाहेरचा पर्याय स्वीकारण्यात आला, असे असे राज्य जलतरण संघटनेचे अध्यक्ष दीपक मेजारी यांनी सांगितले. आम्ही हा निर्णय कोणताही पर्यायच नसल्याने घेतला आहे, असेही त्यांनी सांगितले. राष्ट्रीय स्पर्धेसाठी प्रवेशिका पाठवण्याची अंतिम मुदत एक ऑक्टोबर आहे. या स्पर्धेसाठी पात्रता कामगिरी आवश्यक असते. निवड चाचणीच झाली नाही तर पात्रता कामगिरी कशी नोंदवली जाणार, अशी विचारणा जलतरण संघटना पदाधिकाऱ्यांनी केली. राज्यातील काही जलतरणपटू कर्नाटक, दिल्लीसह काही राज्यात सराव करीत आहेत. पण राज्यातील सर्वच खेळाडूंना चाचणीची संधी मिळायला हवी, असा विचार करण्यात आला. निवड चाचणीसाठी राज्यातील ३६ जिल्ह्यातील प्रत्येकी दहा खेळाडू सहभागी होण्याची शक्यता आहे. विविध स्पर्धा नजिक येत आहेत, त्यामुळे केवळ स्पर्धकांसाठी तरणतलाव खुले करावेत. एका जिल्ह्यात एक तरणतलाव खुला करा. त्यातील खेळाडूंची संख्या मर्यादित ठेवा. चाचणीनंतरच प्रवेश द्या, हे सुचवल्यानंतरही तरणतलाव खुले झाले नाहीत. त्यामुळे चाचणी राज्याबाहेर करण्याचे ठरले, असे मेजारी म्हणाले. अशा होतील चाचण्या सर्व खेळाडूंसाठी गुजरात तुलनेत सोयीस्कर होत आहे. त्यामुळे चाचणी अहमदाबाद-गोटामधील 'सव्ही स्वराज स्पोर्ट्स क्लब'वर करण्याचे ठरले. वरिष्ठ गटाची चाचणी २६ आणि २७ सप्टेंबरला तर ज्युनिअर आणि सब ज्युनिअर गटातील चाचणी २८ ते ३० सप्टेंबरदरम्यान होईल. या चाचणीसाठी जाणाऱ्या स्पर्धकांना अर्थातच करोना नियमांचे सर्व पालन करावे लागणार आहे. त्यामुळे निघण्यापूर्वी त्यांना आरटीपीसीआर चाचणी करावी लागेल. अर्थातच स्पर्धकांना सहभागाच्या अतिरिक्त खर्चास सामोरे जावे लागणार आहे. 'आम्हीही खेळाडूंचा प्रश्न समजू शकतो, पण आमचा नाईलाज आहे', असे ते म्हणाले.
