म. टा. प्रतिनिधी, गणेश विसर्जनाच्या दिवशी शहराच्या मध्यवर्ती भागातील प्रमुख व अंतर्गत रस्ते रविवारी वाहतुकीसाठी बंद करण्यात आले आहेत. रविवारी सकाळी सात वाजल्यापासून ते प्रमुख व मानाच्या गणपतींचे विसर्जन होईपर्यंत रस्ते बंद असतील. वाहनचालकांनी पर्यायी मार्गांचा वापर करावा, असे आवाहन वाहतूक पोलिसांनी केले आहे. करोनाच्या पार्श्वभूमीवर शांततेत पार पडला आहे. गणपतीचे रविवारी विसर्जन असल्याने पोलिसांकडून शहरात कडेकोट बंदोबस्त ठेवण्यात येणार आहेत. गेल्या वर्षीप्रमाणे यंदाही राज्य सरकारने दिलेल्या नियमांनुसार विसर्जन मिरवणूक काढता येणार नाही. घरगुती व सार्वजनिक गणेशोत्सव मंडळांच्या गणपतींचे विसर्जन जागेवरील हौदांत किंवा महापालिकेच्या फिरत्या हौदांत करावे लागणार आहे. मध्यवर्ती भागात मानाचे व प्रमुख गणेशोत्सव मंडळे असल्याने नागरिकांची गर्दी होऊ नये, यासाठी पोलिसांकडून शहरातील मध्यवर्ती भागातील रस्ते वाहतुकीसाठी बंद ठेवण्यात येणार आहेत. छत्रपती शिवाजी महाराज रस्ता : शिवाजीनगरहून स्वारगेटला जाणाऱ्यांसाठी शिवाजी रस्ता स. गो. बर्वे चौकातून वाहतुकीसाठी बंद असेल. वाहनचालकांनी जंगली महाराज रस्ता, खंडुजीबाबा चौक, टिळक चौक, टिळक रस्तामार्गे स्वारगेट व इच्छितस्थळी जावे. बाजीराव रस्ता : स्वारगेटहून शिवाजीनगरला जाणाऱ्या वाहनचालकांसाठी बाजीराव रस्त्यावरील वाहतूक पुरम चौक येथे बंद करण्यात येणार आहे. वाहनचालकांनी स्वारगेट, सारसबाग, पुरम चौक, टिळक रस्ता, टिळक चौक, खंडुजीबाबा चौक, फर्ग्युसन कॉलेज रस्त्याने गणेशखिंड रस्ता, शिवाजीनगरकडे जावे. मध्यवर्ती भाग : शहराच्या उपनगरांमधून येणाऱ्या नागकांसाठी मध्यवर्ती भागात जाण्यासाठी महत्त्वाचे असणारे लक्ष्मी, केळकर, कुमठेकर या तिन्ही रस्त्यांवरील वाहतूक रविवारी बंद असेल. टिळक चौकातूनच तिन्ही रस्त्यांवर जाणारी वाहतूक थांबविण्यात येणार आहे. त्यामुळे वाहनचालकांना पर्यायी मार्गांचा वापर करावा लागेल. अंतर्गत रस्तेही बंद : नागरिकांची व वाहनांची रस्त्यावर होणारी गर्दी टाळण्यासाठी अप्पा बळवंत चौकातून बुधवार चौकाकडे जाणारा रस्ता बंद करण्यात येणार आहे. याच पद्धतीने महात्मा फुले मंडई, तुळशीबाग, बेलबाग चौक, शनिवारवाडा या ठिकाणी जाणारे अंतर्गत रस्तेही बॅरिकेड टाकून बंद केले जाणार आहेत. ---------- गणेशोत्सव विसर्जनासाठी शहराच्या मध्यवर्ती भागातील रस्ते रविवारी सकाळपासूनच बंद करण्यात येणार आहेत. वाहनचालकांसाठी पर्यायी मार्ग उपलब्ध करून देण्यात आला आहे. त्यामुळे वाहनचालकांनीही मध्यवर्ती भागात न येता पर्यायी मार्गाने इच्छितस्थळी जावे. - राहुल श्रीरामे, पोलिस उपायुक्त, वाहतुक शाखा
