दुबई : कोणत्या खेळाडूचं नशिब काय असेल, कोणीही सांगू शकत नाही. दिल्ली कॅपिटल्सच्या संघात त्याची निवड झाली होती, त्यामुळे तो आनंदात होता. पण संघाबरोबर सराव करत असताना त्याला अशी दुखापत झाली की, आता त्याला या आयपीएलमध्ये खेळताच येणार नाही. पण दुसरीकडे जो खेळाडू नेट बॉलर म्हणून संघाबरोबर गेला होता, त्याला आता खेळण्याची संधी मिळणार आहे. आयपीएलला काही दिवस शिल्लक असताना दिल्लीचा संघ दुबईमध्ये सराव करत होता. हा सराव करत असताना दिल्लीचा युवा खेळाडू मनीमरन सिद्धार्थला गंभीर दुखापत झाली. सिद्धार्थच्या पायाला झालेल्या गंभी दुखापतीमुळे आता त्याला संपूर्ण आयपीएल स्पर्धा खेळताच येणार नाही. पण दुसरीकडे संघातील फलंदाजांना सराव करण्यासाठी कुलवंत खेजरोलिया हा युवा गोलंदाज गेला होता. पण आता कुलवंतला लॉटरी लागली आहे आणि तो दिल्ली कॅपिटल्स संघाचा एक भाग होणार असल्याचे दिल्लीच्या संघाने स्पष्ट केले आहे. दिल्लीच्या संघात यावर्षी मोठा बदल करण्यात आला होता. श्रेयस अय्यर हा आयपीएल खेळणार नसल्याचे स्पष्ट झाले होते. त्यानंतर संघातील अनुभवी खेळाडूंना डावलून रिषभ पंतकडे दिल्लीच्या संघाचे नेतृत्व सोपवण्यात आले होते. पहिल्या सत्रात दिल्ली कॅपिटल्स हा संघ अव्वल स्थानावर विराजमान आहे. दिल्लीने पहिल्या सत्रात आठ सामने खेळले होते, या आठपैकी त्यांनी सहा सामन्यांमध्ये विजय मिळवला आहे. त्यामुळे दिल्लीचा संघ हा सध्याच्या घडीला अव्वल स्थानावर विराजमान आहे. गेल्यावर्षी दिल्लीचा संघ अंतिम फेरीत पोहोचला होता. पण त्यांना जेतेपद मात्र पटकावता आले नव्हते. अंतिम फेरीत मुंबई इंडियन्सकडून त्यांचा पराभव झाला होता. पण आतापर्यंतच्या आयपीएलमध्ये त्यांनी अव्वल स्थान कायम राखले आहे. त्यामुळे यावर्षीच्या आयपीएलमध्ये दिल्लीचा संघ पुन्हा अंतिम फेरीत पोहोचणार का आणि सर्वात महत्वाचं म्हणजे आयपीएलच्या जेतेपदाला गवसणी घालणार का, याची उत्सुकता सर्वच चाहत्यांना असेल. त्यामुळे आता दुसऱ्या सत्रात दिल्लीच्या संघाची कामगिरी कशी होते, याकडे सर्वांचे लक्ष लागेलेले असेल.
