दुबई : आयपीएल सुरु होण्यापूर्वीच राजस्थान रॉयल्सच्या संघासाठी आता एक आनंदाची बातमी आली आहे. कारण राजस्थानच्या खेळाडूने धडाकेबाज फलंदाजी करत तब्बल ३८ षटकार आणि २४ चौकार लगावत अफलातून फलंदाजी केली आहे. राजस्थानचा हा फलंदाज आहे तरी कोण, पाहा...राजस्थानच्या संघात नुकतीच एंट्री झाली आहे ती वेस्ट इंडिजच्या इव्हिन लुइसची. इंग्लंडच्या जोस बटलरने आयपीएलमधून माघार घेतली आणि संघापुढे मोठा पेच निर्माण झाला होता. पण राजस्थानच्या संघाने लुईसला संघात स्थान दिले आणि आयपीएलपूर्वीच त्याने आता धडाकेबाज फटकेबाजी सुरु केली आहे. सध्याच्या घडीला वेस्ट इंडिजमध्ये CPL2021 ही ट्वेन्टी-२० लीग सुरु झाली आहे. या लीगमध्ये लुईसने आतापर्यंत १० सामन्यांमध्ये जवळपास ५२च्या सरासरीने ४२० धावा केल्या आहेत. यामध्ये तीन अर्धशतकांचाही समावेश आहे. त्याचबरोबर आतापर्यंत ३८ षटकार आणि २४ चौकरही त्याने १० सामन्यांमध्ये लगावले आहे. त्यामुळे आता आयपीएलमध्ये सर्वांची नजर ही लुईसवर असणार आहे. त्यामुळे आता आयपीएलमध्ये लुईस कशी फलंदाजी करतो, याकडे सर्वांचे लक्ष लागलेले असेल. आतापर्यंत राजस्थानला आयपीएलच्या पहिल्या सत्रात फारशी चांगली कामगिरी करता आलेली नाही. राजस्थानने पहिल्या सत्रात सात सामने खेळले आहे. या सात सामन्यांमध्ये राजस्थानला तीन सामने जिंकता आले आहेत, तर चार लढतींमध्ये त्यांना पराभव पत्करावा लागला आहे. त्यामुळे त्यांच्या खात्यात सहा गुण जमा आहे. गुणतालिकेत राजस्थानचा संघ हा सध्या पाचव्या स्थानावर आहे. त्यामुळे लुईसकडून जर अशीच सातत्याने आक्रमक फलंदाजी झाली तर राजस्थानचा संघ दुसऱ्या सत्रात गुणतालिकेत मोठी झेप घेऊ शकतो. या आयपीएलमध्ये राजस्थानच्या संघात बरेच मोठे बदल करण्यात आले आहेत. संघाचे कर्णधारपद आता संजू सॅमसनकडे सोपवण्यात आले आहे. ्या युवा खेळाडूच्या नेतृत्वाखाली राजस्थानचा संघ या हंगानात कशी कामगिरी करतो, याची उत्सुकता सर्वांनाच असेल. त्यामुळे आयपीएलच्या दुसऱ्या सत्रात राजस्थान कोणत्या संघांवर मात करतो, याकडे सर्वांच्या नजरा असतील.
