म. टा. विशेष प्रतिनिधी, मुंबईः राणीच्या बागेतील पेंग्विनच्या देखभालीसाठी मागवलेल्या १५ कोटींच्या निविदेवरून वाद सुरू झाला आहे. काँग्रेस आणि भाजपने यावरून महापालिकेवर जोरदार टीका केली आहे. म्हणजे कंत्राटदारांसाठी सोन्याचे अंडे देणारी कोंबडी असल्याचा आरोप काँग्रेसने केला आहे. तर भाजपने निधीअभावी विकासकामे थांबली असताना, ही उधळपट्टी कशासाठी, अशा शब्दांत पालिकेवर हल्ला चढवला आहे. राणीच्या बागेत सात पेंग्विन असून, पेंग्विन कक्षाची देखभाल, वातानुकूलन व्यवस्था, जीवरक्षक प्रणाली, पशुवैद्यकीय अधिकाऱ्यांची सेवा आणि पेंग्विनसाठी मासे, अन्न पुरवण्याच्या खर्चापोटी सन २०२१ ते २०२४ या तीन वर्षांसाठी १५ कोटी २६ लाख २३ हजार रुपये खर्चाची निविदा मागवण्यात आली आहे. सन २०१८ ते २०२१चे देखभालीचे कंत्राट ७ सप्टेंबरला संपत आहे. मागील तीन वर्षांत पेंग्विन देखभालीसाठी १० कोटी रुपये खर्च आला होता. त्यात यंदा आणखी पाच कोटींची भर पडली आहे. 'पेंग्विन परदेशातून आणले, तेव्हा पालिकेचेच डाॅक्टर त्यांची वैद्यकीय तपासणी व आरोग्य व्यवस्थापन करत होते. त्यामुळे आपल्या डाॅक्टरांना पेंग्विनच्या आरोग्याची पुरेशी माहिती आहे,' असे विरोधी पक्षनेते रवी राजा यांनी सांगितले. पालिकेचे डॉक्टर नेमले जाणे शक्य असताना, निविदा काढून बाहेरून कंत्राटदार नेमण्याची गरज काय, असा सवाल करत राजा यांनी हे कंत्राटदारांचे उखळ पांढरे करण्याचा प्रयत्न असल्याचा आरोप केला आहे. करोनामुळे पालिकेची आर्थिक स्थिती खालावली असताना, विकासकामांसाठी एक एक रुपया वाचवणे आवश्यक असताना, कंत्राटदाराची भर कशासाठी, असा प्रश्न विचारला आहे. भाजपचे गटनेते प्रभाकर शिंदे यांनी मुंबईतील कोणत्या कामाला प्राधान्य द्यायचे आणि किती निधी खर्च करायचा हे एकदा पालिकेने ठरवण्याची वेळ आली आहे, असे सांगितले. पालिका आर्थिक दिवाळखोरीच्या उंबरठ्यावर असताना, सत्ताधारी शिवसेना आणि प्रशासन करदात्यांच्या पैशांची कशी उधळपट्टी करते आहे, हे यानिमित्ताने मुंबईकरांना दिसते आहे. गेल्या कंत्राटापेक्षा यंदा थेट पाच कोटींची वाढ हे कंत्राटदारासाठी चाललेले उद्योग आहेत. एकीकडे निविदा काढून निधीअभावी विकासकामे थांबवण्यात आली असताना, कोणत्या कामांना प्राथमिकता द्यायची याचा विचार प्रशासनाने केला पाहिजे, असे शिंदे म्हणाले. पेंग्विन म्हणजे कंत्राटदारांसाठी सोन्याचे अंडे देणारी कोंबडी आहे. कोट्यवधीच्या कंत्राटाने अंड्यांची संख्या वाढत जाऊन कंत्राटदाराचे उखळ पांढरे होणार आहे. - काँग्रेस १० कोटींचे कंत्राट १५ कोटींवर म्हणजे मुंबईकरांच्या पैशांची कशी वासलात लावली जाते हे दिसते आहे. शिवसेना आणि पालिका प्रशासनाने याचे उत्तर द्यावे. - भाजप पेंग्विनवरील खर्च - एका दिवसासाठी २० हजार रुपये - सात पेंग्विनसाठी दररोज १.५ लाख - एका महिन्याचा खर्च सहा लाख रुपये - एका महिन्याचा खर्च ४२ लाख रुपये - एका वर्षाचा एका पेंग्विनचा खर्च ७१ लाख रुपये - एका वर्षाचा सात पेंग्विनचा खर्च पाच कोटी रुपये - एकूण तीन वर्षांसाठी १५ कोटी रुपये
