स्वप्नील शिंदे | : सातारा नगरपालिकेची निवडणूक जवळ आली असून जिल्ह्यातील राजकीय वातावरण ढवळून निघालं आहे. भाजपचे राज्यसभा खासदार आणि आमदार शिवेंद्रसिंहराजे भोसले यांच्यामध्ये आरोप-प्रत्यारोप सुरू असताना सोमवारी भाजप पदाधिकारी आणि कार्यकर्ते यांच्या बैठकीत स्वतंत्र पॅनल उभा करण्याची घोषणा जिल्हाध्यक्ष विक्रम पावसकर यांनी केली आहे. सातारा नगरपालिकेत उदयनराजे भोसले यांच्या नेतृत्वाखाली सत्ताधारी सातारा विकास आघाडी आणि विरोधात यांच्या नेतृत्वाखाली नगर विकास आघाडी व तिसरा भाजपच्या नगरसेवकांचा गट आहे. गेल्या निवडणुकीच्या वेळी उदयनराजे व शिवेंद्रराजे दोघेही राष्ट्रवादीत होते. मात्र दोन वर्षांपूर्वी झालेल्या विधानसभा व सातारा लोकसभेच्या पोटनिवडणुकीच्या आधी दोघांनीही भाजपमध्ये प्रवेश केला. या दोघांना विरोध म्हणून राष्ट्रवादी पक्ष काँग्रेस व शिवसेनेला सोबत घेऊन लढवणार असल्याची चर्चा सुरू आहे. त्यात आता खासदार व आमदार या दोघांच्या गटाविरोधात भाजपने स्वतंत्र पॅनल टाकण्याच्या दृष्टिकोनातून तयारी सुरू केली आहे. काय आहे भाजपची भूमिका? भाजप सातारा शहर वॉर्ड प्रभारींची बैठक सातारा शासकीय विश्रामगृहात पार पडली. यावेळी जिल्हाध्यक्ष विक्रम पावसकर, प्रदेश कार्यकारणी सदस्य अमित कुलकर्णी, महिला मोर्चा उपाध्यक्ष सुवर्णाताई पाटील, जिल्हा सरचिटणीस विठ्ठल बलशेट्टी, शहराध्यक्ष विकास गोसावी व भाजपचे सर्व नगरसेवक उपस्थित होते. यावेळी पावस्कर म्हणाले की, भारतीय जनता पार्टीच्या कार्यकर्त्यांनी सातारा नगरपालिकेची निवडणूक डोळ्यासमोर ठेवून कामाला सुरुवात केली आहे. सातारा शहरातील सर्व १३१ बुथवर बूथ कमिट्यांचे काम सुरू आहे. त्यामुळे सातारा नगरपालिका निवडणूक भारतीय जनता पार्टी पूर्ण ताकतीने लढेल, असा विश्वास पावसकर यांनी व्यक्त केला. 'सातारा शहरातील कार्यकर्ते चांगलं काम करत असून भाजपचे कमळ हे चिन्ह घराघरात पोहोचवावे. सर्वांनी मिळून काम केलं तर आपल्याला अवघड काहीच नाही, फक्त पक्षाशी एकनिष्ठ राहून काम करावे. तिकीट मिळाले तर निवडून येण्यासाठी प्रयत्न करावे आणि तिकीट मिळाले नाही तर पक्षाने ज्यांना उमेदवारी दिली आहे, त्यांच्या मागे ठामपणे उभे राहावे,' असं आवाहन यावेळी अमित कुलकर्णी यांनी सर्व कार्यकर्त्यांना केलं.
