म. टा. खास प्रतिनिधी, कोल्हापूर येथे चालविल्याप्रकरणी मुंबई पोलिसांनी अटक केलेल्या वकील राजकुमार राजहंस याने युट्युबवरून एमडी ड्रग्ज तयार करण्याचे धडे घेतल्याचे त्याच्या चौकशीतून समोर आले आहे. न्यायालयाने राजहंस याच्या कोठडीत २५ नोव्हेंबरपर्यंत वाढ केली आहे. मुंबई पोलिसांच्या अमली पदार्थ विरोधी पथकाच्या वांद्रे युनिटच्या पथकाने काही दिवसांपूर्वी ५० ग्रॅम एमडी ड्रग्जसह क्रस्टिना मॅग्लीन ऊर्फ आयेशा हिला अटक केली. कोल्हापूरच्या चंदगड तालुक्यातील ढोलगरवाडी येथून एक वकील एमडी आणून देत असल्याचे या महिलेने चौकशीत सांगितले. दोन दिवसांपूर्वी अंमली पदार्थविरोधी पथकाने पोल्ट्री फार्मच्या नावाखाली सुरू असलेल्या ड्रग्ज फॅक्टरीवर छापा टाकला. या फॅक्टरीत काम करणारा आणि फार्महाऊसचा केअरटेकर निखील लोहार याला अटक करण्यात आली. ही फॅक्टरी आणि हा फार्महाऊस राजकुमार राजहंस या वकिलाचे असल्याचे लोहार याने चौकशीत सांगितले. अंमली पदार्थविरोधी पथकाने गुरुवारी राजहंस याला मालाड येथून ताब्यात घेतले. सुमारे वर्षभरापासून तो एमडी ड्रग्जचे उत्पादन आणि विक्री करीत होता. कोठडी संपत असल्याने पोलिसांनी सोमवारी पुन्हा राजहंस याला न्यायालयात दाखल केला असता त्याची पोलिस कोठडी २५ नोव्हेंबरपर्यंत वाढविण्यात आली. मोबाइल नष्ट केल्याचा संशय राजहंस कोल्हापूरमधून मुंबईत एमडी ड्रग्ज आणून छोट्या विक्रेत्यांपर्यंत पुरवत असल्याने त्याच्या संपर्कात अनेक किरकोळ विक्रेते असावेत असा पोलिसांचा अंदाज आहे. मात्र आपल्या संपर्कात असलेल्या ड्रग्ज विक्रेत्यांपर्यंत पोलिस पोहचू नयेत यासाठी त्याने मोबाइल नष्ट केल्याचे म्हटले जात आहे. वांद्रे खाडीमध्ये राजहंस याने मोबाइल फेकल्याची शक्यता असून पोलिसांकडून शोध सुरु आहे.
